Салгыны ыраастыыр хартыылары балыыһаларга бэлэхтээтилэр

35

Хоту дойду хоһуун дьонун олоҕун сырдатар хартыыналар быыстапкаҕа турдулар. Бу өрөспүүбүлүкэ 100 сылыгар анаммыт акция иитинэн суруллубут айымньылар. Хартыына ахсаана үбүлүөйдээх сылы кытары тэҥ. Бырайыакка эдэр худуоһунньуктар үлэлэстилэр, маны сэргэ аҕыйах ахсааннаах төрүт омуктар бэрэстэбиитэллэрэ холоннулар. Уруһуйдьуттар бары хотуттан төрүттээх буоланнар акция темата арылхайдык арыллыбыт.   

Айымныьалар салгыны ыраастыыр анал кыраасканан суруллубуттар. 1 кв. миэтэрэ хартыына 1 улахан маска тэҥнээх.  

Кырааска күҥҥэ эбэтэр лампа уотугар салгыҥҥа баар буортулаах эттиктэри бэйэтигэр иҥэринэн, нитракка кубулутар. Туһалаах кыраасканы аан дойдуга биир эрэ тэрилтэ оҥорор эбит, кинилэр Саха сиригэр социальнай хабааннаах бырайыактарга анаан ыыппыттар. Хас биирдии хартыына салгыны эрэ буолбакка киһи уйулҕатын уоскутар, сырдыкка кэрэҕэ угуйар күүстээх. Эдэр худуоһунньуктар холусталарыгар  хоту дойду маанылаах кыыла - таба, хайа умсугутуулаах кэрэ көстүүлэрэ үгүстүк суруллубуттар. Маны сэргэ туундараҕа оҕо саас кэрэ кэмнэрэ истиҥник сырдатыллыбыттар. Кылгас кэмҥэ бу үлүгэрдээх элбэх хартыына - эдэр худуоһунньуктарга олус улахан ситиһии.

Айна Куртц, худуоһунньук: "Худуоһунньуктар биир сомоҕо буоламмыт сүрэхпит  этэринэн өбүгэлэрбит куоластарын истэн хотугу култуура уһугуннун диэн барыта 100 хартыынаны суруйдубут. Толкуйбутун, санаабытын бу сыл аҥарын иһигэр барытын үчүгэй көрүҥҥэ дириэрдэ сатаатыбыт".

Хартыыналары чэбдик эйгэҕэ ордук наадыйымтыа сиргэ балыыһаларга бэлэхтиэхтэрэ. Онон сотору кэминэн доруобуйа харыстабылын дьиэлэрэ ыраас салгыны иҥэринэр ойуулары тутуохтара. Быраастар сүрүннээн оҕо күүтэр ийэлэргэ барсыан сөптөөх хартыыналары бэлиэтии көрдүлэр. Итиэннэ оҕолорго аналлаах суруйуулар олус күндүлэрин эттилэр.

Дмитрий Сергин, СӨ доруобуйа харыстабылын миниистирин бастакы солбуйааччы: "Хартыыналар доруобуйа харыстабылын бөдөҥ тэрилтэлэригэр ыйаныахтара. Холобур, өрөспүүбүлүкэтээҕи 1№-дээх уонна 2№-дээх балыыһаларга хайаан да тиксэриэхпит. Маны сэргэ улуустарбытын умнубаппыт".

Быыстапкаҕа турбут үлэлэр худуоһунньук энергиятын эрэ буолбакка улахан суолталаах тэрээһиннэр тыыннарын иҥэринэллэр. Ол курдук бастакы хартыына дьахталлар сийиэстэригэр суруллубут. Маны сэргэ ыһыах алгыстаах түһүлгэтигэр, Илиҥҥи экономическай форумҥа уруһуйдаммыттар. Аҕыйах ахсааннаах төрүт омуктар олохторун сырдатар уонна киэҥ эйгэҕэ тарҕатар бу бастакы уопут.

Любовь Христофорова, СӨ аҕыйах ахсааннаах төрүт омуктар түмсүүлэрин салайааччытын солбуйааччы: "Бу хартыыналар аҕыйах ахсааннаах омуктар олохторугар, кыһалҕаларыгар дьон болҕомтотун тардаллар. Маннык омуктар бааллар эбит араас бырайыактарга сырдаталлара хайҕаллаах, ону биһиги өйүүбүт уонна махтанабыт".  

Быыстапка арыллыытыгар кыттыбыт дьон акция түмүктүүр хартыынатыгар киистэлэрин суолун хааллардылар. Онон бырайыак суолтата өссө  кэҥээтэ. Ураты хартыыналар  бу ый 22 күнүгэр диэри норуоттар доҕордоһууларын дьиэтигэр көрүөххэ сөп.