Кыайтарбат бөрө

22

Ньурба улууһун Хаҥалаһыгар быйыл кыһын бөрө мэнээктээн үгүс хоромньуну аҕалла. Адьырҕа кыыл Хаҥалас уонна Үөдэй нэһилиэгин икки ардыгар орохтонор. Бүтэһигин бу аҕыйах хонуктааҕыта нэһилиэктэн 10-ча килэмиэтир тэйиччи хаһан аһыы сылдьар сылгылары таппыттар. 

Олохтоох булчуттар күүстэринэн быйыл кыһын икки бөрө бултаммыт. Саҥа дьыл иннинэ биир уонна бу аҕыйах хонуктааҕыта булчут Иван Иванов хапкааннаан ылбыт.

Серафим Винокуров, Хаҥалас нэһилиэгин баһылыга: "Бөрөлөр буулааннар улахан хоромньуну таһаардылар. Ол курдук биһиги нэһилиэккэ сэттэ чааһынай киһи сылгытын уонна үс ынах сүөһүнү тартылар. Олохтоох булчуттар сүрдээҕин бултаһаллар. Олохтоох дьаһалтаттан, улуус дьаһалтатыттан уматыгынан көмөлөһөбүт".

Айылҕа харыстабылын министиэристибэтин ааҕыытынан Саха сиригэр күн бүгүн 9 тыһ. тахса бөрө баар. Бу көрдөрүү сылын аайы үрдээн иһэрэ дьиксиннэрэр. Ахсаан элбиирин биир төрүөтэ - бөрөнү утары охсуһарга үбүлээһин тиийбэтэ. Ааспыт сылга  өрөспүүбүлүкэ бюджетыттан 5,5 мөл. солк. эрэ көрүллэн турар. Онтон бу суммаҕа сыл бүтэһигэр эбии 6,4 мөл. солк. тыырыллан, былырыын бултаммыт 500 бөрөҕө төлөбүр оҥоһулубут.

Николай Додохов, СӨ айылҕа харыстабылын миниистирин солбуйааччы: "30 тыһ. буолла хас биирдии бөрөҕө. Манна анаан 15 мөл. солк. көрүлүннэ. Биллэн турар, бу суумма аҕыйах, 500 эрэ бөрө төлөбүрүгэр тиийэр. Онтон биһиги сыл аайы, харчы баар буоллаҕына, 700-800 бөрөнү бултуур кыахтаахпыт. Онтон быйыл булчуттарга уматыгынан, туһаҕынан, хапкаанынан уонна саппаас чааһынан көмөҕө үбүлээһин көрүллүбэтэ. Ону кулун тутарга өрөспүүбүлүкэ бюджетын хаттаан көрүүгэ туруорсуохпут диэн санана сылдьабыт".

Аны Сиэмэх кыыл ахсаанын аччатыыга саҥа киирбит ирдэбил биһиги региоммутугар сөбө суоҕа атахтыыр. Манна ыйылларынан бөрөнү 3 эрэ күн бултаныахтаах. Ол иһин биирдиилээн булчут көҥүлүнэн балаһыанньаттан тахсаллар.  Исписэлиистэр этэллэринэн, дьиҥэ, бөрө сылы эргиччи бултаннаҕына эрэ кыаллар кыахтаах. Элбии турар ахсаан охсуута -  тыа хаһаайыстыбатар.  

Ааспыт сылга бөрө тыа хаһаайыстыбатыгар хоромньутун уопсай ахсаана – 5 тыһыынчаттан тахса дьиэ табата уонна 100 тахса сылгы. Адьырҕа кыыл өрөспүүбүлүкэ бары улуустарыгар улахан кыһалҕаны үөскэтэр. Исписэлиистэр этэллэринэн, тымныы кэмигэр дьиэ кыылыгар саба түһүү үксүүр.

Адьырҕа кыылы утары охсуһууга олохтоох булчуттар, хаһаайыстыбалаах дьоннор миэстэтигэр туруналлар. Бөрөҕө булт олус уустук буолан сонордьут ахсаанын тиийбэтэ эмиэ кыһалҕаны сытыырхатар.  Онтон сур бөрө хоромньуну таһаарыыта элбэх сирдэригэр анал биригээдэлэр тэриллэллэр.

Онтон бу үлэ быйыл эбии үп көрүлүннэҕинэ эрэ  салҕанар кыахтаах. Оттон тирии иһин төлөбүрү аахсыы туһааннаах тэрилтэ билиннэҕинэ кулун тутартан саҕаланыа.