Сыл сүрүн соруга - нэһилиэнньэни үлэнэн хааччыйыы

Быйылгы сыл Саха сиригэр Үлэ сылынан биллэриллибитэ. Сыл сүрүн соруга - нэһилиэнньэни үлэнэн хааччыйыы, олохтоох каадырдары бэлэмнээһин.

Анастасия Позднякова, Саха сирин нэһилиэнньэтин дьарыктаах буолуутун судаарыстыбаннай кэмитиэтин бэрэссэдээтэлин бастакы солбуйааччы: "Сыл түмүгүнэн үлэтэ суох ахсаана 30 тыһ. тахса буолла.  Ол аата  таһыма 6,6%. Бу көрдөрүү инники сылга 7,1% этэ, онон быйыл куһаҕана суох таһымҥа таҕыстыбыт. Быйыл сүрүн болҕомтону ыччакка уонна тыа сиригэр ууруохпут".

Үлэ киинэ үлэтэ суох хаалбыттары быстах үлэлэринэн  хааччыйар эбэтэр  бэйэлэрин дьыалаларын тэрийэллэригэр субсидиянан көмөлөһөр. Киин туһааннаах тэрилтэлэри, үлэ миэстэтин биэрээччилэри кытта ыкса үлэлэһэр. Тустаах исписэлиистэр этэллэринэн, сүрүннээн атыы-эргиэн, тырааныспар, судаарыстыбаннай салалтаҕа, бырамыысыланнас өттүгэр үлэ тахсар.

Юлиана Омукчанова, Дьокуускай куорат нэһилиэнньэтин дьарыктаах буолуутун киинин иниспиэктэрэ: "Ордук "Олохтоох дьону бырамыысыланнаска" бырагырааманан дьон үөрэнэр уонна үлэ булар. Маны сэргэ бөдөҥ тэрилтэлэр наадыйар исписэлиистэрин үөрэттэрэн баран үлэҕэ ылар түгэннэрэ үгүс".

Дьарыктах буолуу киинэ эбии үөрэхтээһиҥҥэ күүстээх үлэни ыытар. Үлэ киинэ нэһилиэнньэни кылгас болдьохтоох анал куурустарга үөрэттэрэн, тэрилтэлэр араас салааларыгар үлэҕэ киллэрэр. Маны сэргэ киин үлэ дьаарбаҥкатын, араас тэрээһиннэри нэһилиэнньэҕэ тиһигин быспакка  ыытар.

Иванна Аргунова, Дьокуускай куорат нэһилиэнньэтин дьарыктаах буолуутун киинин тэрилтэлэри кытары үлэҕэ салаатын салайааччы: "Араас хабааннаах үлэ дьаарбаҥкаларын тэрийэн ыытабыт. Ордук оҕо сайыҥҥы өттүгэр дьарыктаах буолуутугар үлэлэһэбит. Хас биирдии үлэҕэ киирбит оҕоҕо биһиги сулууспабытыттан 5700 солк. хамнаһыгар эбии көрүллэр".

Маны тэҥэ быйыл үлэ киинэ быстах хомууртан кэлбит дьону уонна кинилэр дьиэ кэргэттэрин үлэнэн хааччыйыыга болҕомтону күүһүрдэр соруктаах.