Элбэх оҕолоох ыаллары босхо гаастааһын

36

Дьиэҕэ гааһы киллэриигэ биир кэмнээх харчынан көмөнү элбэх оҕолоох ыалларга дохуоттарын кээмэйиттэн тутулуга суох бириэхтэрэ.

Социальнай гааһынан хааччыйыы бырагыраамата дойду үрдүнэн 2021 сыллаахтан олоххо киирэн үлэлиир. Бу ааспыт сылга Саха сирин олохтоохторуттан 4 тыһыынчаттан тахса сайаапка киирбититтэн 3,5 тыһыынча кэриҥэ ыалы кытта дуогабар баттаһан, сыл түмүгүнэн уопсайа 2800 тахса дьиэ кэргэн гаас киллэттэрэн турар. Улуустарга бу бырагырааманан үлэ көхтөөхтүк тэриллэр. Ордук үрдүк көрдөрүүнү Чурапчы, Мэҥэ Хаҥалас, Горнай улуустара уонна Дьокуускай куорат ситистэ. Ол курдук киин куоракка 900  тахса ыал гаас киллэттэрэр кыахтанна. Босхо гаас ситимин таттарыыга, ол эбэтэр субсидия көмөтүнэн аҕыйах дохуоттаах элбэх оҕолоох ыал, инбэлииттэр, сэрии бэтэрээннэрэ, итиэннэ  байыаннай эппэрээссийэ кыттыылаахтарын дьиэ кэргэнэ хапсар. Оттон бу күннэргэ Ил Дархан туһааннах дьаһалга уларытыылары киллэрэн, элбэх оҕолоохтор дохуоттарыттан тутулуга суох бары хааччыллар буолуохтара диэн мэктиэлээтэ.

Антон Томскай, "Сахатранснефтегаз" тэрилтэ гаас ситимин тардыыга салалтатын начальнига: "Биһиги салалтабыт уопсай улахан гаас ситимиттэн тэлгэһэҕэ диэри аҕалан биэрэр. Онтон дьиэҕэ диэри киириитин ороскуотун дьон бэйэтэ уйунуохтаах. Бу манна өрөспүүбүлүкэ бюджетыттан көмөҕө тиксээччилэргэ биир кэмнээх өйөбүл оҥоһуллар. Бу сылга көмө 150 тыһ. солк. Тэҥнэһиэ".

Маныаха гаастааһыҥҥа өрөспүүбүлүкэттэн биир кэмнээх көмө кээмэйэ эрдэ 100 тыһ. солк.  былырыын үрдээн 150 тыһ. солк. тэҥнэспитэ. Бу харчыны гаас турбатын дьиэҕэ киллэриигэ, дьиэ-ис-тас өттүгэр тардыыга, гааһынан оттор хочуол, билиитэ, суоттуур тэрил, радиатор, ыстаал уонна пластик турбалары ылынныыга, гаас тэрилин холботорго, таҥарга туттуохха сөп. Көмөнү ылыыга сайабылыанньаны улуус дьаһалтатыгар, куорат уокуругар олорор сиринэн бэриллэр.

Афанасий Постников, СӨ үлэ уонна социальнай сайдыы миниистирин солбуйааччы: "Дохуоту аахсыбакка элбэх оҕолоох ыалга өйөбүл оҥоһуллар буолла. Бу бырагыраама инники сылларга үлэлии турбута. Ааспыт 2022 сылга уопсайа барыта 1206 ыал холбоммута. Онтон быйыл бу ахсаан элбиэ диэн сүрдээҕин үөрэбит. Докумуоннары олохтоох дьаһалталарга, онтон Дьокуускайга куорат дьаһалтатыгар эбэтэр уокурук быраабатыгар биэриэхтэрин сөп".  

Былырыын социальнай гаастааһын бырагырааматыгар "Сахатранснефтегаз" тэрилтэ чахчтынан 2800 тахса дьиэ кэргэн хабыллыбыт буоллаҕына, быйыл 1800 дьиэ5э гаас ситимин тардар  сорук турар