Режиссер Дмирий Давыдов "Эдэр саас" диэн саҥа киинэтэ сүрэхтэниэҕэ

17

Тохсунньу 19 күнүгэр Өрөспүүбүлүкэ бары киинэ тыйаатырдарыгар,  режиссер Дмирий Давыдов "Эдэр саас" диэн ааттаах саҥа үлэтэ,  улахан экраҥҥа тахсыаҕа. Трагикомедия жанрдаах киинэ сүрэхтэниитэ буолуон иннинэ,  суруналыыстарга, киинэ эйгэтин үлэһиттэригэр көрдөрдүлэр.

Рок тэтимнээх ырыа доҕуһуола, көрөөччүнү бастакы мүнүүтэттэн абылыыр. Саха сиригэр эрэ буолбакка, бүтүн Дойду үрдүнэн бэйэтин дьоҕурунан, буочарынан Саха киинэтин аатырдыбыт Дмитрий Давыдов саҥа киинэтэ, тохсунньу 19 күнүгэр улахан экрааннарга тахсыаҕа. Ис хоһоонуттан кыратык сэгэтэн кэпсээтэххэ, 40 саастаах Вася "уол", 20 сыл буолан баран төрөөбүт дэриэбинэтигэр төннөр, бачча сыл устата олох укулаата уларыйбыт, салҕыы кини хайдах буолар...  Сүрүн оруолу эдэр эрчимнээх артыыс Альберт Алексеев толордо.

"Киинэҕэ мин аан маҥнайгыбын сүрүн оруолга кытынным. 100 быраһыан буолбатах буоллаҕына, 200 быраһыан дууһабытын ууран туран үлэлээбиппит. Тыйыс тымныылар турбуттара. Тиийдэ тиийээт,  чап-чараас күһүҥҥү атах таҥаһа кэтэрдибиттэрэ. Чараас кожа сон уонна 65 кыраадыс тымныыга бардыбыт, уһуллубут диэбиттэрэ. Тоҥо-тоҥобут, иттэн ыла-ыла киинэбитин устубуппут", - диэн сүрүн оруолу толорооччу Альберт Алексеев кэпсиир.

Кырдьык, киинэ олус тымныы бириэмэҕэ, дьыл оҕуһун муоһа сытыыланар кэмигэр уһуллубут. 15 смена иһигэр үлэ баран,  ырыа доҕуһуоллаах трагикомедия жанрдаах киинэ, "Хардыы" рок-бөлөх айымньыларын сабыдылыанан уһулунна диэн режиссёр санаатын үллэстэр. Киинэ тустаах ырыа бөлөх үлэтин үйэтитэргэ туһуламмыт. 

"Амма төрүт олохтооҕо буолар, сахалыы өйдүүр, толкуйдуур. Уонна бэйэтэ билинэринэн, “Хардыы” рок-бөлөх сабыдыалынан айбыт. Сценарийын бэйэтэ суруйбут. Бу бөлөх туһунан үгүс саха киһитэ билэрэ буолуо, 90 сылларга кинилэр сүрдээх аатыра, биллэ-көстө сылдьыбыттара. Билигин даҕаны элбэх киһи "Наҕыллык, хаар түһэр..." ырыаны бэрт билэллэр. Киинэҕэ бөлөх 8 ырыата киирдэ. Онон үйэтитилиннэ диэн эмиэ этиэххэ сөп буолуо", - диэн киинэ пиар продюсера Яна Байгожаева сырдатар.

Маны тэҥэ, киинэ саундтрегынан клиип уһулунна. Онон кырдьык,  "Хардыы" рок-бөлөҕү үүнэр көлүөнэ да билиэҕэ диэн устар бөлөх үөрүүтүн үллэстэр