Кыһыҥҥы суолларынан оттугу таһыыга улахан болҕомтону уураллар

Өрөспүүбүлүкэ үрдүнэн кыһыҥҥы суолларынан суолталаах таһаҕаһы, оттугу тиэйиини-таһыыны анал хамыыһыйа мунньаҕар дьүүллэстилэр. Бырабыытылыстыба бэрэссэдээтэлин бастакы солбуйааччы Дмитрий Садовников киин болҕомтону хоту арктическай улуустарга уурары сорудахтаата. Бэрт сотору 60 кыраадыска диэри тымныылар түһэллэринэн,  хонтуруолу икки бүк күүһүрдэр ирдэнэр.

Сыл ахсын бу саҕана, кыһыҥҥы уустук кэмҥэ, улуустарга таһаҕас тиэйиитэ тэтимирэр. Ол курдук өрүстэринэн, күөллэринэн суоллар аһыллан сырыы көхтөөхтүк тэриллэр. Бүгүҥҥү күҥҥэ 103 учаастак баарыттан, 85 аһыллан турар. Кыһыҥҥы суолларга  массыына сылдьар уйуктарын сыыйа үрдэтэн иһэллэр. Бу күннэргэ Хатас-Павловскай хайысханан отут тоннаҕа, Кангалас-Суотту уонна Амма суолларыгар сүүрбэ тоннаҕа диэри ыйааһыннаах транпорт сылдьара көҥүллэннэ. Быйыл тонааһы үрдэтии ааспыт сылтан бытааран иһэр. Сүрүн төрүөт - тутаах өрүстэргэ муус чарааһа буолар.

"Холобура, былырыыҥҥы көрдөрүүнү көрдөххө, муус халыҥа 30-35 см. Ааспыт сыллааҕар чараас. Онон сибээстээн,  корректировкалар ыытылла тураллар. Хатас, Суотту өттүн этэр буоллаххына, тохсунньу 10 күнүттэн үрдэттибит тонааһын. Федеральнай суолларга, Бүлүү өрүскэ, 30 тоннаҕа диэри. Уонна Алдан, Халыма суолугар 40 тоннаҕа диэри", - диэн СӨ транспорт уонна суол-иис хаһаайыстыбатын миниистирин бастакы солбуйааччы Анатолий Потапов этэр.

Салҕыы муус халыҥын ыллаҕына, кэккэ суолларга уйук кээмэйин олунньу ыйга үрдэтиэхтэрэ. Кыһыҥҥы суолларынан, бастакы уочарат, оттугу таһыыга улахан болҕомтону уураллар. Бырабыытылыстыба  бэрэссэдээтэлин бастакы солбуйааччы Дмитрий Садовников  суолталаах таһаҕаһы, чуолаан оттугу тиэйии-таһыы хаамыытын, тустаах хамыыһыйа мунньаҕар хонтуруоллаата. Ордук ыраах тайаан сытар хоту арктическай улуустарга болҕомто күүһүрүөн наадатын мунньахха бэлиэтээтилэр. Үүнэр күннэргэ, Саха сирин илин эҥэр, Бүлүү бөлөх, киин уонна хоту улуустарга 50 тахса - 60 кыраадыска диэри тымныйара күүтүллэр. Онон тустаах эппиэттээх тэрилтэлэр үрдүк бэлэмнээх буолаллара ирдэнэр.

"Хонтуруолбутугар баар Аллараа Халыма Андрюшкино нэһилиэгэ уонна  Дьааҥы улууһун Табалаах нэһилиэгэ. Билигин барытын ырытан баран, биһиги кэккэ сорудахтары биэрдибит. Бу сорудахтар туолалларын ирдиэхпит. Кэлээри турар тымныыларга, барыта этэҥҥэ буолуо диэн эрэллээхпит", - диэн СӨ Бырабыытылыстыбатын бэрэссэдээтэлин бастакы солбуйааччы Дмитрий Садовников иһитиннэрэр.

Нэдиэлэ саҥата Дьааҥы улууһун Уһун Күөл нэһилиэгэр намыһах хаачыстыбалаах чохтон, хочуолунай үлэтэ харгыстаммыта. Ааспыт  сайын Дьааҥы улууһа ууга баран оттук кэмэ уустуктаах ааһан иһэр. Онтон тохсунньу саҥатыттан,  Андрюшкиноҕа Орто Халыматтан ниэби, таас чоҕу таһыыны саҕалаабыттара. Бэлиэтээн эттэххэ, бүгүҥҥү күҥҥэ, өрөспүүбүлүкэ үрдүнэн  уопсайа 875 тыһыынча тонна суолталаах таһаҕас, ол иһигэр оттук, ас тиксэриллиэхтээҕиттэн, икки сүүстэн тахсата миэстэтигэр тиксэриллэн турар. Онтон арктическай улуустарга 195 тыһыынча тонна таһаҕас тиэллэрэ былааннаммыт. Улахан тымныылар турар кэмнэригэр, хочуолунайдар үлэлэрэ туруктаах буолуутун хааччыйар туһуттан, үлэ эбии күүһүрүөҕэ