Байыастарга көмө хомуйуутугар уларыйыылар киирдилэр

19

Дьокуускай куоракка волонтерскай кииҥҥэ, анал байыаннай дьайыыга кытта сылдьааччыларга, көмөнү хомуйуу тиһигин быспакка ыытыллар. Манна Өрөспүүбүлүкэ араас улууһун дьонуттан-сэргэтиттэн күннэтэ сылаас таҥас, ас-үөл хомулла, кэлэ турар. Быйылгыттан көмөнү хомуйууга кэккэ уларыйыылар киирдилэр.

"Саха сирэ эйигинниин" диэн уопсастыбыннай волонтерскай киин,  нэһилиэнньэттэн уонна тэрилтэлэртэн, көмөнү хомойууну бу сылга эмиэ салҕыыр. Ол чэрчитинэн, Дьокуускай куорат 13 нүөмэрдээх оскуолатын үөрэнээччилэрэ, учууталлара бэйэлэрин баҕаларынан хомуйбут сылаас таҥастарын, минньигэс астарын уонна араас открыткалары, суруктары аҕалан туттардылар.

үгүн биһиги баһыылка аҕаллыбыт, Украинаҕа сылдьар байыаннадарга. Сылаас таҥас баар, хампыаттар бааллар уонна открыткалар, баҕа санаалар, доруобай туруктаах, түргэнник кэлэллэрин курдук", - диэн  Дьокуускай куорат 13 №-ээх оскуолатын үөрэнээччитэ  Саввинова Валерия этэр.

Сүрүннээн, сылаас таҥас, бэрчээккэ, бэргэһэ, балаклава. Ону тэҥэ, кыра ас наада диэн волонтердар этэллэр. Манна тэрилтэлэр, биирдиилээн дьон бэйэҕит көмөҕүтүн илдьиэххитин сөп. Оҕолор суруктары суруйаллар, саҥа дьыллааҕы эҕэрдэлэрин өссө даҕаны аҕала тураллар. Быйыл көмөнү хомуйууга кэккэ уларыйыылар киирдилэр. Өскөтүн, инники эми-тому уонна чопчу биирдиилээн киһиэхэ көмөнү ылар эбит буоллахтарына, билигин оннук суох буолла. Бу туһунан "Саха сирэ эйигинниин" уопсастыбаннай хамсааһын бэрэссэдээтэлэ Айыл Дьулурҕа иһитиннэрдэ:

"Эмтэри ылбаппыт. Ол гынан баран, дьон аптекаҕа төлөөн, биһигини ыҥырдаҕына, биһиги аптекаттан ылар кыахтаахпыт. Дьонтон ылар кыахпыт суох. Аадырыстаах баһыылкалары эрдэ ылар эбит буоллахпытына, билигин ылбаппыт. Почта России тутар. Ол эрэн, Почта России тутарыгар байыаннай чаас нүөмэрин көрдүүр, сорохтор билбэттэр. Төрөппүттэргэ, аймахтарга сүбэлиэхпит этэ, ханнык военкоматтан барбыт сирдэриттэн ыйытан, байыаннай чаас нүөмэрин билиэххитин сөп".

Кэлбит малы суруйан, ааҕан барытын учуоттаан иһэллэр. Манна ким тугу уонна төһөнү аҕалбыта барыта бэлиэтэнэн сурукка тиһиллэн иһэр. Бүтэһик рейс ааспыт сыл ахсынньы 27 күнүгэр барбыта. Сотору кэминэн өссө биир рейс барыахтаах, онно сылаас таҥас, оҕолор суруктара, саҥа дьыллааҕы эҕэрдэлэрэ барыахтаахтар.

"Сороҕор наһаа элбэх буолан кутуллан кэлэллэр, уочараттыыллар   тутарбытыгар. Төрүт кэлбэтэх күннэрэ диэн суох, кэлэ тураллар. Ол иһин нэһилиэнньэҕэ, улуустарга олус махтанабыт. Хоту улуустартан, Дьааҥылартан бүгүн туттубут, кинилэр сөмөлүөтүнэн, дьонунан ыыталлар.  Онтон манна тутаммыт, сурукка тиһэн иһэбит", - диэн волонтёр Анна Ефимова кэпсээтэ.

Өссө да инникитин маннык хабааннаах көмөлөр салҕана туруохтара. Волонтерскай киин үлэһиттэрэ аны эми уонна аадырыстаах көмөнү ылбаппыт диэн санаталлар. Бэйэҕит көмөҕүтүн Орджоникидзе уулуссатын 10 нүөмэрдээх дьиэтигэр илдьиэххитин сөп.