Суһал медициинэ көмөтүгэр 5000 тахса иһитиннэрии киирдэ

Саҥа дьыллааҕы уһун өрөбүллэр кэмнэригэр, суһал медицинскэй көмөнү оҥоруу, туох да улахан уратыта суох ааста. Дьокуускай куоракка кыһыҥҥы кэмҥэ суһал көмөнү оҥорууга массыына, биригээдэ ахсаанын элбэтэллэр, онон уопсайа түүннэри-күнүстэри 25 биригээдэ үлэлиир. Аһыы утах содулуттан араас эчэйиилэри ылыы - улахан үрдээһинэ да, аччаһына да суох.

"Кыһын элбиир. Улахан травмалар, үлүйүүлэр баар буолаллар. Бу сылга, бырааһынньыктарга кыратык элбээн турар, атын ыарыылары кытары тэҥнээн көрдөххө, улахан уратыта суох", - диэн Суһал медицинскэй көмө станциятын сүрүн бырааһын солбуйааччы Любовь Матаннанова кэпсээтэ.

Диспетчерскайга эмиэ быраастар олорон үлэлииллэр. Манна хас мүнүүтэ ахсын саҥаттан саҥа вызов кэлэ турар.

Онтон салҕыы туохтара ыалдьыбытын, суһал көмөҕө наадыйалларын, эбэтэр поликлиника бырааһыгар ыыталларын быһаараллар. Ол курдук, бу саҥа дьыллааҕы бырааһынньыктар кэмнэригэр 5 152 ыҥырыы киирбититтэн, 4000 курдуга суһал көмөҕө наадыйааччылар эбит. Онтон 1000 тахса ыҥырыыны  поликлиника быраастарыгар тыырбыттар.

"Күнүскү бириэмэҕэ “неотлажнай” ыҥырыылар бааллар, олору биһиги поликлиникаҕа биэрэ сатыыбыт. Уонна "скоропомощнай" ыҥырыылар диэн  бааллар, онно биһиги бэйэбит айанныыбыт. Хаан барыыта, инсульт, инфаркт, психоз, травмалар. Киэһээҥҥи өттүгэр ыҥырыы элбиир", - диэн Суһал медицинскэй көмө станциятын бырааһа  Ольга Максимова иһитиннэрдэ.

Өскөтүн көмөнү суһаллык оҥоруохха наада буоллаҕына, быраастар саамай уһаабыта, ыарыһахха 20 мүнүүтэ иһигэр тиийиэхтээхтэр. Онтон уһуо суохтаахтар. Быраастар, суоппардар өрүүтүн бэлэм олороллор.

Суһал көмө киинигэр вызов киирбитин кэнниттэн, массыына гараж иһиттэн собуоттанан тахсан барыар диэри, уопсайа 1,5 мүнүүтэ бэриллэр.

Биир сууккаҕа, ортотунан 600-700 вызов киирэр. Биригээдэлэр 12 чаас буола-буола уларыйаллар, онон биир да мүнүүтэ тохтобула суох үлэлииллэр.  Суоппар Клим Нарахаев этэринэн:

"Сарсыарда 7 чаастан саҕалаан, киэһэ 19:00 чааска диэри үлэлиибит. 12 чаас устата сүүрэбит. Ыҥырыы арааһынай буолар, күҥҥэ ортотунан биир массыынаҕа 10 кэриҥэ ыҥырыы. 25 массыынаттан 3 резерваҕа турар".

Онон суһал медициинэ көмөтүн оҥоруу, бу курдук тэтиминэн, күүһүрдүллүбүт бэрээдэгинэн кыһын устата ыытыллыаҕа. Халлаан сылыйдаҕына, биригээдэ ахсаанын үһүнэн аччатыахтара