"Ньургун Боотур"  опера дьон сэҥээриитин ылар

"Ньургун Боотур" испиктээкил Саха сиригэр ахсынньы бүтүүтэ көстүбүтэ. Уонна көрөөччүлэр көрдөһүүлэринэн, бу ыйга эмиэ туруоруллар буолбута. Былатыан Ойуунускай айымньытыгар олоҕурбут дьүһүйүү, Өрөспүүбүлүкэ төрүттэммитэ 100 сылыгар анаммыта. Бөдөҥ бырайыак дьон сэҥээриитин ылла.

Опера бэһис төгүлүн көрөөччүлэргэ турар. Аан бастаан сэрии кэмигэр турбута. Ол кэннэ 1957 сыллаахха Москва куоракка көстөн аатырбыта,  элбэх киһи биһирэбилин ылбыта. Аатырбыт режиссер Андрей Борисов бу иккис туруорааһына буолла.

"Испиктээкилбит саха норуотун култууратын сүмэтэ буолар. Сүрүн өйдөбүл барыта баар. Саха норуотун сиэрин-туомун, кылыһаҕын, тойугун, мелодиятын олохтоох даҕаны, атын да омук билэр буоллаҕа. Ол иһин манна премьера буолара, биһиэхэ ордук эппиэтинэстээх", - диэн "Ньургун Боотур" опера туруорааччы режиссера Андрей Борисов иһитиннэрэр.

Ньургун Боотур оруолун Саха Өрөспүүбүлүкэтин норуодунай артыыһа Александр Емельянов толорор. Опера саҥа көрүүлээх туруоруллубут буолан, ураты, интириэһинэй. Хас да чаастан турар, уот-күөс, таҥас-сап, сцена уларыйа турар.

Екатерина Корякина операҕа улахан, сүрүн оруоллаах. Кини Туйаарыма куону оонньуур. Бу артыыс бастакы улахан холонуута буолар. Онон икки бүк эппиэтинэстээх, долгутулаах уонна улахан чиэс буолар диэн этэр:

"Андрей Саввич Борисов туоруута олох атын буолла: тыына, хабаана. Сүрүнэ диэн улахан турукка киирии уонна Былатыан Ойуунускай аатын үйэтитии буолар".

Бу операҕа хас да коллектив хабыллан үлэлиир. Саха сирин артыыстара, оркестр, "Олоҥхо" тыйаатыра уонна да атын култуура эйгэтин тэрилтэлэрэ. Испиктээкилгэ 320 көстүүм анаан-минээн тигилиннэ. Барыта 300 кэриҥэ артыыс кыттыыны ылла.

Былатын Ойуунускай "Ньургун Боотур" айымньытын 33 олоҥхоттон таҥан суруйбут буоллаҕына, опера туруоруутугар араас норуоттар култуураларыттан элеменнэр киирдилэр: скифтэр, хууннар сабыдыаллара, шумерскай искусство кытта көстөр. Саха сирин олохтоохторугар "Ньургун Боотур" опера, бүгүн үһүс түмүктүүр күнэ.