Биир кэлим төлөбүргэ сайабылыанньа хомуйуу салҕыы ыытыллар

16 диэри саастаах оҕолорго уонна хат дьахталларга туһуланар биир кэлим көмө харчыга докумуону хомуйуу барар. Ааспыт сыл бүтэһик күннэригэр уонна сыл саҕаланыытыгар, Дойду үрдүнэн сүүһүнэн тыһыынча сайабылыанньа хомулунна. Онтон үлэ күнэ саҕаланыаҕыттан, Саха сиринээ5и социальнай пуонда уонна элбэх өҥөнү оҥорор киин докумуону тутан саҕалаата.

Норуокка биллэринэн, МФЦ нөҥүө докумуоннары туттарааччы, буоларын курдук, үгүс. Эдьиийдии балыстыы Лилия уонна Елена Туприналар иккиэн элбэх оҕолоохтор. Эрдэ ый аайы төлөнөр, 3-7 диэри уонна 7-17 диэри, босуобуйаны ыла сылдьыбыттар. Онтон биир кэлим төлөбүр олохтоммутугар мунаахсыйар ыйытыылара үгүс буолан, элбэх өҥөнү оҥорор кииҥҥэ кэлбиттэр.

Санатан эттэххэ, сайабылыанньалары ылыы ахсынньы 28 күнүттэн саҕаламмыта. Онтон тохсунньу бастакы күннэригэр Дойду үрдүнэн 670 тыһыынчаттан тахса сайаапка бэриллибит. Мантан 5 тыһыынчаттан тахса сайаапка Саха сириттэн. Бу барыта “Госуслуги” судаарыстыбаннай өҥөнү онорор портал нөҥүө киирбит. Үлэ күнэ саҕаланыаҕыттан, элбэх өҥөнү оҥорор кииннэргэ, докумуону туттарыы тэтимнээхтик саҕаланна.  

Сэттэ араас көмөнү түмэр босуобуйа Дойду бүддьүөтүттэн төлөнөр. Манна 1,7 триллион солкуобай көрүллүбүт. Ахсынньы 28 күнүттэн саҕалаан, өрөбүл күннэр усталарыгар, электронно ыытыллыбыт сайабылынньалар билигин социальнай пуондаҕа тиксэриллэннэр, номнуо биир кэлим төлөбүр ананыыта барар.  

Этэн аһарыллыбытын курдук, сайабылыанньа социальнай пуондаҕа, элбэх өҥөнү оҥорор кииннэргэ уонна "Госуслуги" судаарыстыбаннай порталга бэриллиэн сөп. Босуобуйаны туһанааччыттан ханнык да ыспыраапка, эбии докумуон ирдэммэт. Дохуот кээмэйин уонна баай-дуол туһунан иһитиннэриини социальнай пуонда туһааннаах биэдэмистибэлэртэн бэйэтэ ылар. Сайабылыанньа ортотунан көрүллэр болдьоҕо, 13 үлэ күнэ.

Онтон төлөбүр кээмэйэ инники курдук ыал  дохуотуттан тутулуктананан, ыйдааҕы тиийинэн олоруу кээмэйин 50, 75 уонна 100% буолуоҕа. Холобур, Саха сиригэр үрдээбитинэн орто кээмэй, 21 706 солкуобайга тэҥнэстэ. Онон көмөҕө тиксээччи элбиэн сөп. Ааспыт сылга 7-17 диэри саастаах 41 тыһ. оҕо  ый аайы төлөнөр көмөнү туһаммыта. Саҥа биир кэлим пособие бастакы төлөбүрдэрэ бу ый иккис аҥарыгар кэлиэхтэрэ диэн мэктиэлииллэр.