Саҥа дьылааҕы өрөбүллэргэ алын суудуналарга иниспиэксийэ икки бүк үлэлээтэ

Саҥа дьыллааҕы өрөбүллэргэ алын суудуналарга иниспиэксийэ үлэтин икки бүк күүһүрдэн үлэлээтэ. Сүрүн болҕомтону балыксыттарга, суоппардарга уонна мууска үлэлиир дьоҥҥо уурдулар.

40-тан тахса  кыраадыс тымныыны ахсарбакка Нам улууһун олохтооҕо Тимофей Попов мууһу кытары тустар. Дьокуускай куорат 202 микрооройуонугар оҥоһулла турар кыһыҥҥы муус пааркатыгар кини оҕолор аттракционнарын оҥорор. Кини туһааннаах риэйдэ иһитиннэриитин болҕомтолоохтук истэн, илиитигэр листовка тутта.

Тимофей Попов, Нам улууһун олохтооҕо: "Муус быйыл арыый да чараас. Мантан антах дьэ халыҥыа. Холобур, бу тэпсиллибит сиринэн миэтэрэттэн ордук".

Бырааһынньык кэмигэр үгүс саахал, оһол тахсар буолан тустаах биэдэмистибэ нэһилиэнньэни кытары күүстээх үлэни  ыытта.

Майя Алексеева, СӨ ЫБММ алын суудуналарга иниспиэксийэтин салайааччы: "Балыксыттары, суоппардары кытары биирдиилээн кэпэстиилэри ыытабыт. Маны сэргэ көҥүлэ суох муус суолунан сылдьааччылары хонтуруоллуур холбоһуктаах риэйдэлэри ыыттыбыт. Билигин былааннаммыт 51 муус суолуттан 43 үлэлии турар. Санатан эттэххэ, көҥүлэ суох муус суолунан сылдьыы иһин СӨ административнай кодексынан биирдиилээн дьон 3-5 тыһ. солк. Ыстарааптаналлар".

Көҥүллэммэтэх муус суолунан айан иһин 100-тан тахса административнай боротокуол оҥоһулунна. Маныаха 202 микрооройуоҥҥа турбут, сокуон кэһиитин кэтиир камера нөҥүө, номнуо 500-тан тахса дьыала көбүтүллүбүт. Онон сотору кэминэн көҥүллэммэтэх сиринэн сылдьыбыт суоппардар административнай дьыала суругун тутуохтара диэн иниспиэктэрдэр иһитиннирэллэр.

Маннык хабааннаах риэйдэлэр манан тохтоон хаалбакка ыытылла туруохтара диэн биэдэмистибэ иһитиннэрэр.