ГИБДД үлэһиттэрэ суолга-иискэ бэрээдэги көрүүнү күүһүрдэллэр

Ахсынньы 26 күнүттэн тохсунньу 8 күнүгэр диэри ГИБДД үлэһиттэрэ суолга-иискэ бэрээдэги көрүүнү күүһүрдүөхтэрэ. Сүрүн болҕомто итирик туруктаах суоппардарга ууруллуоҕа. Өскөтүн суолга итирик туруктаах, эбэтэр бэрээдэгэ суох айанныыр киһи массыына ыыта сылдьарын көрдөххүтүнэ, тутатына 127 нүөмэргэ эрийэн биллэрин диэн ГИБДД ыҥырар.

Саҥа Дьыллааҕы  аймалҕан оргуйан олорор. Дьокуускай суоллара бүтүннүү масыыналарынан туолан, кэлии-барыы үксээн турар кэмэ. Сыл түмүктэнэрэ аҕыйах күн хаалла. Онтон суол быһылааныгар статистика чахчытын ыллахха, былырыыҥҥыттааҕар үгүс көрдөрүү үрдээбитэ бэлиэтэнэр. Сыл саҕаланыаҕыттан Өрөспүүбүлүкэ үрдүнэн уопсайа 700 тахса суол саахала тахсыбытын түмүгэр, 80 тахса киһи суорума суолланна, 900 тахса киһи араас эчэйиини ылла. Былырыын, бу кэмҥэ, көрдөрүү уонтан тахса бырыһыанынан аҕыйах этэ.

"Аварийноһы көрдөхпүтүнэ, сатыы сылдьааччыны түннэри көтүү элбээбитин көрдөрөр. 185 быһылаан тахсыбыт, 14 киһи олоҕо быстыбыт, 182 киһи эт-хаан эчэйиитин ылбыт. Былырыыҥҥы турукка, 151 этэ. Уонна 16 сааһыгар диэри суол кыттыылаах суол саахалыгар оҕо эчэйиитэ элбээбитин көрдөрөр. 102 суол саахалыгар 3 оҕо суорума суолламмыта. 111 оҕо балыаһаҕа көрдөрбүтэ. Былырыын баччаларга 89 суол саахала эбит", - диэн  Суолга-иискэ куттала суох буолууну хаачыйар СӨ госинспекциятын  пропагандаҕа инспектора Күннэй Иванова иһитиннэрдэ.

Арыгы иһиилээх ыытааччыларга эппиэтинэс кытааппыта, балаһыанньаны бүтүүннүү уларыппат эрээри, тутар. Өскөтүн, суоппар аан бастакытын итирик туруктаах олорбут буоллаҕына, 30 тыһ. ыстыраапка уонна балтараа сылтан икки сылга диэри ыытар быраабын былдьатар. Онтон иккиһин түбэстэҕинэ, административнай ыстыраапка эрэ буолбакка, холуобунай эппиэтинэскэ тардыллан хаайыллыан сөп.   Маныаха суол инспекциятын үлэһиттэрэ саахалы сэрэтэр инниттэн араас бэрэбиэркэлэри, рейдэлэри, нэдиэлэ аайы тиһигин быспакка тэрийэллэр.

Бу күннэртэн саҕалаан, тохсунньу 8 күнүгэр диэри «Болҕойуҥ, оҕолор!» диэн сэрэтии тэрээһинэ, былаан быһыытынан тэриллэр. Маны тэҥэ, бырааһынньыктар иннилэринэ, бэрэбиэркэлиир рейдэ үлэлэрэ күүһүрүөхтэрэ.  Онон суол-иис кыттааччыларын, суоппардары эрэ буолбакка, сатыы сылдьааччылары  эмиэ, айан суолугар бэрт сэрэхтээх буоларгытыгар ыҥыраллар.

Саҥа дьыллааҕы сүпсүлгэн чугаһаабытынан, бэрэбиэркэ икки бүк үрдүөҕэ. Сүрүннээн, тыаттан киирээччилэргэ сэрэтии, өйдөтүү үлэтэ күүһүрүөҕэ. Тоҕо диэтэр,  бырааһынньык иннинэ массыынаны уоруу түгэнэ элбиир диэн суол инспекциятыгар иһитиннэрэллэр. Быйыл уопсайа 150 массыынаны уорбуттара бэлиэтэммит. Хас биирдии быһылаан - бу киһи олоҕо.  Суол-иис хамсааһынын кыттааччылара, бэрт болҕомтолоох буолаллара эрэйиллэр эрээри, статистика сыл ахсын тэҥ, эбэтэр үрдүк сыыппараны көрдөрөр. Онон кыра да аччааһын - бу ситиһии