Бу сылга бүтэһик "Күөх рейстэр"

60

Главное

"Якутоопттрог" тэрилтэ Хоту уонна Арктическай улуус олохтоохторугар саҥа дьыллааҕы остуолга ууруллар бородууктаны тиэйэн, түмүктээн эрэр. Күн бүгүн оройуоннарга уопсайа уонтан тахса тыһыынча туонна оҕуруот аһа, фруукта уонна да атын көрүҥ ас-үөл тиэрдилиннэ.

Орто Халыма улууһун олохтоохторун үөрдээри, сип-сибиэһэй ас-үөл, оҕуруот уонна фруукта көтөр аалга тиэллэн бүттэ. "Якутоопттрог" тэрилтэ, норуокка биллэринэн, "Пятак" улахан ыскылаатыгар - бүтэһик ыгым күннэр. Күн бүгүн,  Дьокуускай куорат аэропордуттан көтөр аал "Күөх рейсы" Халыма эҥээр илдьиэҕэ.

"Саҥа дьыл иннинэ Хоту улуустарга сөмөлүөтүнэн ыытар оҕуруоппут аһын уонна фруукталарбытын ыытан олоробут. Билигин 2 сөмөлүөт хаалан турар. Орто Халымаҕа көтөөрү тиэллиннэ. Уонна Тиксиигэ барара хаалла. Чокурдаах, Өлөөн, Абый, Уус-Куйга, Зырянка, Муома сөмөлүөттэрэ көппүттэрэ. Маны таһынан, биһиэхэ сибиэһэй мандарин кэлбитэ, ону барытын Хоту улуустарга ыыттыбыт. Нэһилиэнньэҕэ, куорат олохтоохторугар эмиэ атыылыы олоробут. Саҥа дьыл кэнниттэн зимниктары бэлэмниибит. Массыыналар номнуо бэлэм тураллар", - диэн тэрилтэ үлэһитэ Галина Румянцева кэпсээтэ.

2022 сылга тустаах тэрилтэ, Хоту уонна Арктическай улуустарга таһаҕаһы тиэйиигэ, былаанын 100% толордо. Социальнай суолталаах бородуукта - бурдук, айан суолунан айаннаан, 4085 туонна тиэрдилиннэ, уунан, сөмөлүөтүнэн 2171 туонна.  Биллэрин курдук, билигин олохтоох атыыһыттар сыаналарын олус үрдэтэн тураллар. Онон бу рейстэр тиийэннэр, сыана халбаҥныаҕа диэн үлэһиттэр тоһоҕолоон этэллэр.

"Бу ааһан эрэр 2022 сыл, Ил Дархан Айсен Николаев уонна Өрөспүүбүлүкэ бырабыытылыстыба туруорбут сыалларын-соруктарын ситистибит. Сыл этэҥҥэ ааһан эрэр. Бэйэбит муоранан сылдьар хараабылбытынан Волга өрүһүнэн киирэммит, Соҕуруу федеральнай уокурук Астрахань куоратыгар тиийэн, 1,5 тыһ. туонна бородууктаны тиэйэн аҕалбыппыт. Ол бородуктаабыт үчүгэйдик тиийдэ. Маны барытын анаалыстаан толкуйданыахпыт", - диэн "Якутопторг" тэрилтэ генеральнай дириэктэрэ Николай Алексеев иһитиннэрдэ.

Онтон кэлэр сылга, кыһыҥҥы айан суолунан таһаҕастары тиэйии былаана 6683 туоннаҕа тэҥнэһэр, ол иһигэр бурдук 4000 тахса туонна

Читайте также