Аны 10 сылынан Дьокуускайга хаарбах туруктаах мас дьиэ суох буолуо

Бүгүҥҥү күҥҥэ өрөспүүбүлүкэ үрдүнэн 2012-2017 сылларга 3600 дьиэ хаарбаҕынан тустаах көһөрүү бырагырааматыгар киирбитэ. Онтон киин куоракка уопсайа 664 хаарбах дьиэ баара бигэргэммитэ.  Дьокуускайга уопсайа биэс тыһыынчаттан тахса киһи олорор усулуобуйатын тупсарыахтаах. Бэлиэтээн этэххэ, куорат үрдүнэн биир тыһыынчаттан тахса мас дьиэ баар, ол дьиэлэргэ 35 тыһыынча киһи олорор.

Ол эбэтэр билигин 2012-2017 сылларга хаарбаҕынан бырагыраамаҕа хапсыбыт дьиэ олохтоохторо эрэ саҥа дьиэлэнэр кыахтаахтар. Онтон 2017 сыл кэнниттэн эмиэ тыһыынчанан дьиэ баара биллэр. Ол курдук 2017 сыл тохсунньу 1 күнүттэн Саха сиригэр хаарбаҕынан уонна аварийнайынан 2,5 тыһ. кэриҥэ дьиэ бигэргэммитэ, ол иһигэр Дьокуускайга 855 дьиэ. Онон көһөрүү үлэтэ өссө да хара баһаам. Дьокуускайы тэҥэ, улуустарынан ыллахха саамай элбэх хаарбах дьиэлээхтэринэн  Алдан, Нерюнгри уонна Ленскэй куората буолаллар.

Игорь Алексеев, СӨ тутууга министиэристибэтин олорор дьиэни тутуу дирекциятын программалары олоххо киллэрэр салаатын салайааччы: "Билигин элбэх үлэ күүтэр. Бырагыраамаҕа 3600 дьиэ киирбитэ. Онтон аҥарын көһөрдүбүт. 500 -чэкэ дьиэни үлэҕэ киллэрдибит".

Маныаха Дьокуускайга программа иккис түһүмэҕин кэлэр сылга болдьох иннинэ түмүктүүр киэҥ соруктаахтар. Дьиҥэ былаан 2025 сылга диэри турар. Үүнэр сылга Дьокуускай үрдүнэн хаалбыт 85 элбэх квартиралаах эргэ мас дьиэттэн дьону көһөрүөхтэрэ. Онтон уон сыл иһигэр, 2032 сылга диэри киин куоракка мас хаарбах дьиэ толору суох буолуохтаах диэн бөдөҥ ыра санаа кэриэтэ сыал-сорук турар. Быйыл куорат үрдүнэн үс аҥар тыһыынча киһи олорор усулуобуйатын тупсарда.

Улуустарга эргэ хаарбах дьиэттэн дьону көһөрүү көхтөөхтүк барар. Холобура, Нам улууһугар 2013 сылтан 5 саҥа дьиэ тутуллан киирдэ.

Владислав Ушаков, I-Хомустаах нэһилиэгин дьаһалтатын исписэлииһэ: "Хаарбах дьиэлэри көһөрүүнү биһиги 2013 сылтан саҕалаабыппыт. Ол курдук 2014, 2016  сылларга уонна былырыын элбэх квартиралаах дьиэлэри үлэҕэ киллэрдибит".

Көһөрүү бырагырааматын иккис түһүмэҕэ 2025 сылга диэри сал5аныаҕа. Саха сирин үрдүнэн быйыл уопсайа 165 саҥа дьиэ тутуллан үлэҕэ киирдэ. Кэлэр сылга өссө 75 дьиэ тутуллара былааннанар