"Сайсары" ырыынакка эт, балык сыаната
Саҥа дьыл буолара аҕыйах хонук хаалла. Дьон бары бырааһынньыктааҕы остуолун тэрийэр түбүккэ сылдьар. Киин куорат олохтоохторо сүрүннээн эти-балыгы "Сайсары" ырыынактан атыылаһаллар.
Уус Алдан улууһуттан сылдьар Николай Жирков убаһа, сылгы этинэн эргинэр. Николай Николаевич улуустан кэлэн олохтоох хаһаайыстыба этин атыылыыбын диэн этэр. Сыана быйыл биллэ эбиллэн турар диэн санаатын үллэстэр. Холобура, убаһа ойоҕоһун киилэтэ 1500 солкуобай, хаан 2000 солкуобай кэриҥэ, харта 1000 cолкуобай.
Амсайыан баҕалаах, Саха сирин күөллэригэр, өрүстэригэр үөскүүр, талбыт балыгын ылар кыахтаах. Соботтон, сордоҥтон, күндүөбэйтэн, дьарҕааттан саҕалаан, чыыр, уомул балыкка тиийэ эгэлгэ көрүҥ кыстаммыт. Ырыынакка балык сыаната, кырдьык, көмүскэ тэҥ. Холобура, собону киилэтин 300-350 солкуобайтан, оттон кыһыллар үрүҥ балыгы, кыччаабыта биир тыһыынчаттан саҕалаан атыылаһыахха сөп.
Сыл сүрүн бырааһынньыгар бэлэмнэнии сүпсүлгэнэ, салгыҥҥа кытта тарҕаммыкка диэри. Харыйа турбута, уот-күөс тардыллыбыта сүргэни көтөҕөр. Сарсыардаттан киэһээҥҥи диэри кэлии-барыы оргуйан олорор. Быйыл олохтоох эккэ сыана үрдээбитэ, харахха тута быраҕыллар.
Ынах этин киилэтин 650 солкуобайтан, оттон убаһа этин 1000 саҕалаан атыылаһыахха сөп. Эриллибит эт сэттэ сүүсчэкэ гыраама 500, сибиинньэ этэ киилэтэ 450-500 солкуобайга турар. Онон баҕалаах киһи, эти биир үксүн кыралаан, киилэнэн эрэ атыылаһарыгар тиийэр.
Булт этин амсайыан баҕалаахха, куобах кытта баар. Оттон сир аһын араас көрүҥэ эмиэ хото тэлгэммит. Уулаах отон киилэтин 400 солкуобайга быспыттар. Ырыынакка эт, балык эгэлгэтин үгүс дьон музей курдук көрөбүт диэн этэллэр. Манна куорат эрэ олохтоохторо буолбакка, улуустартан кытта кэлэн атыылаһан бараллар.
Бу күннэргэ дьон кэлиитэ өссө элбиэ турдаҕа. Бырааһыньыктааҕы остуолга деликатес аһы амсайар инниттэн, сорох дьон сыананы кэрэйбэт. Төһө кыалларынан, кыраны да буоллар атыылаһарыгар эрэ тиийэр.
