Нам киинигэр култуура дыбарыаһа дьэндэйдэ

Саҥа тутуу маннайгы сыбаайата икки сыллааҕыта Өрөспүүбүлүкэ күнүгэр түспүтэ. Бырайыак Ил Дархан быһа дьаһалынан, саха чулуу уола биллэр государственнай, общественнай уонна политическай деятель Максим Кирович Аммосов 125 сылын бэлиэтиир сылыгар тутуллан  киирдэ. Култуура уонна духуобнас сайдыытын киинэ 3 мэндиэмэнээх, 6 тыһынча кэринэ кв. метрэ иэннээх Республикаҕа биир бастын баараҕай тутуу буолар.

"Бука бар ыра санаа оҥостубут улахан баай уораҕайбыт үлэҕэ киирбититтэн бары долгуйа үөрэбит. Биһиги көһүөхпүт иннинэ 1956 сыллаах 500кв.м. иэннээх дьиэҕэ олорбуппут. 2016 сыллаахха хаарбах туруктааҕынан биллэриллибитэ. Саҥа көспүт дьиэбит олус улахан, Саха сирин тыа сиригэр саамай улахан култуура киинэ диэххэ сеп", - диэн эттэ Нам улууһун култуура уонна духуобунай сайдыы киинин дириэктэрэ Николай Жирков.

Саҥа  тутууга барыта холбоон улуус алта култуура эйгэтин тэрилтэлэрэ киирдилэр. Ол курдук 400 миэстэлээх көрөөччу саалата, библиотека, ЗАГС салалтата, историко-этнографическай түмэл, Национальнай уус-уран түмэл Намнаа5ы салаатын хартыына галереята баар.

Улуустааҕы библиотека саҥа кииннэ көһөн үөрүүтэ муҥура суох. Күн бүгүн манна 30 үлэһит үлэлиир.  Манна ааҕар хос, иккис этээскэ оҕо модельнай библиотеката уонна үһүс этээскэ улуустааҕы киин библиотеката киирдэ. Итиэннэ библиотека иһинэн эдэр ыччат киинэ арыллынна. 

"Инниктин молодежнай зона уонна смарт лаборатория тэрийэхпитин баҕарабыт. Эдэр ыччаппытын инник гынан бэйэбитигэр тардаары гынабыт. Талааннарын, дьоҕурдарын сайыннараары. Кун бугун улуустааҕы библиотека 5 тыь кэринэ ааҕааччылаах, оттон оҕо модельнай библиотеката 3 тыһынча ааҕааччылаах", - диэн этэр Намнааҕы киин библиотека дириэктэрин солбуйааччы Александра Никонова.

Нам улууһун дьоно-сэргэтэ талааннааҕа урут урукуттан биллэр. Онон олохтоохтор маннык саҥа дьиэлэммиттэриттэн сүргэлэрэ көтөҕүллэн, өссө айар-тутар, саҥа үрдэллэри дабайар баҕалаахтар.

"Улахан уеруулээх бырааьынньакка бэлэмнэннибит, сахалыы танас тиктэммит, бары далбар хотуттара уерэ-кете кэтэн ыалдьыттары керустубут. Бу кэлэр кэнчээри ыччаппытыгар кэнники учугэй уораҕайы бэлэхтээбиттэрин иьин саха ереспуубулэкэтин, Ил дарханна махтанабыт", - эттэ Нам улууһун олохтооҕо Авдотья Гаврильева.

Нэһилиэк олоҕо сайдарыгар, инники кэскилэ кэрэни кэрэхсииригэр, талааннар арыллалларыгар сөптөөх усулуобуйа тэриллэн, култуура киинин үлэтэ, ону тэҥэ дьон-сэргэ олоҕо саҥа таһымҥа тахсар кыахтанна. Биэс сыл устата өрөспүүбүлүкэҕэ 39 култуура обийиэгэ үлэҕэ киирбит. Кэлэр сылга өссө эбии 12 эбийиэк тутуллара былааннанар.