Киин куорат баһылыга сыл түмүгүнэн  пресс-конференция тэрийдэ

Дьокуускай куорат баһылыга Евгений Григорьев сыл түмүгүнэн, суруналыыстары кытта көрсөн, улахан пресс-конференция тэрийдэ. Үгэс быһыытынан, сыл ахсын тэриллэр пресс-конференцияҕа куорат уонна өрөспүүбүлүкэ суруналыыстара кытыннылар.

Маннык форматынан куорат баһылыгын кытта  көрсүһүү балаҕан ыйыгар ыытыллыбыта. Бу сырыыга тэрээһин "Айти-куб" оҕо цифровой үөрэхтээһинин киинигэр буолла. Пресс-конференция Дьокуускай эргин арыгы атыытын бэрээдэктээһин хайдах тэриллэриттэн саҕаланна. Евгений Григорьев быйыл бу хайысхаҕа улахан үлэ ыытыллыбытын бэлиэтээтэ. Социальнай эбийиэктэртэн арыгы атыылыыр маҕаһыыннар сүүс миэтэрэҕэ диэри тэйиччи туралларын ситиспиттэрэ. Маны тэҥэ, куорат дьаһалатын көҕүлээһининэн, Ил Түмэҥҥэ арыгы атыытын бириэмэтигэр, усулуобуйатыгар, миэстэтигэр туһунан сокуоҥҥа уларытыылары киллэрии бастакы ааҕыытын ааспыта. Онно ыйылларынан, арыгыны атыылыыр туочука Дьокуускайга 75, онтон улуустарга 50 квадратнай иэнтэн кыра буолуо суохтаахтар.

Салҕыы биир сүрүн боппуруоһунан, куорат уопсастыбыннай транспорын тиэмэтэ буолла. Сыл ахсын куорат нэһилиэнньэтэ улаатар, онтон билигин айанныыр хайысхалар 2000 сыллардаахха таҥыллыбыттара. Ааспыт сылтан  уопсастыбыннай транспорт систиэмэтин  уларыта тутууга бэлэмнэнии барар диэн Евгений Григорьев эттэ.  Бүгүҥҥү күҥҥэ научнай-чинчийэр үлэ ыытыллар. Ол түмүгүнэн, Дьокуускайга төһө киһи автобуһунан туһанарын, ханнык маршруттар саамай ноҕоруускалаахтарын, ханан саҥа маршруттары киллэриини чопчу быһаарыахтара. Маны тэҥэ, саҥа автобустары атыылаһыы салҕанара күүтүллэр, кэлэр сылга эбии сүүс автобуһу атыылаһыахтара.  Айан төлөбүрүн чааһынай автобустаахтар түмсүүлэрэ 45 солкуобайга диэри үрдэтэри туруорсалларын баһылык бэлиэтээтэ. Кини үрдээһин буоллаҕына, инфляция көрдөрүүтүн куоһарыа суоҕа диэн эрэннэрдэ. Оттон сыл сүрүн түмүгүн, өрөгөйдөөх үбүлүөйдэри тэҥэ аҕыйах тылынан Евгений Николаевич субу курдук иьитиннэрдэ:

"Бу сылга элбэх тэрээһин уонна үлэ барда. Үбүлүөйүнэн саҥа эбийиэктэр тутулуннулар, көһөрүү бырагыраамматынан тыһыынчанан киһи саҥа дьиэҕэ көстө. Саҥа оскуолалар тутулуннулар, суоллар оҥоһулуннулар. Хаһан да буолбатах, элбэх кыбартыыралах дьиэлэр тиэргэннэрин өрөмүөнэ ааста. Туох баар былааннамыт үлэ тиһэҕэр тиийдэ, түтүктэннэ".

Сылаас автобус тохтобулларын тула ыйытыы эмиэ киирдэ. Вандаллары уонна ускул-тэскил сылдьар дьон кыһалҕата  сытыытык турарын бэлиэтээтилэр. Маннык сылаас тохтобуллар биһиги кыһыммытыгар наадалаахтарын баһылык этэн туран, салҕыы элбэтэн иһиэхпит диэтэ. Билигин сэттэ уонча сылаас тохтобул баар эбит буоллаҕына, инникитин сүүскэ диэри тиэрдэр сорук турар. Суруналыыстар, маны  тэҥэ, бэйдиэ сылдьар ыттар балаһыанньаларын сурастылар. Сүрүннээн, куорат ыттары тутар-харайар сиригэр, бүрсүллүөс ыарыы тарҕаммытын тула. Евгений Григорьев ыарыы боппуруоһу ветеринария департамена быһаарар, оттон куорат дьаһалтата тохтоло суох бэйдиэ сылдьар ыттары тутууга үлэлэһэр диэн иһитиннэрдэ. Оттон хаһаайына суох сылдьар аттар кыһалҕалара, штрафстоянка киириэҕиттэн быһаарыллан эрэр. Тэрээһиҥҥэ салгыы тутуу, социальнай гаастааһын, туризм, Кыайыы пааркатын, куораты көҕөрдүү, хомуурга хабыллыбыт дьон дьиэ кэргэттэригэр көмө боппуростара эмиэ таарыллыннылар.