"Чаҕылхай Максим суолунан"

Саха чулуу уола, биллэр судаарыстыбыннай, уопсастыбыннай уонна политическай диэйэтэл Максим Кирович Аммосов төрөөбүтэ 125 сылыгар  уонна Өрөспүүбүлүкэ төрүттэммитэ 100, Дьокуускай куорат төрөөбүтэ 390 сылларын бэлиэтии, "Чаҕылхай Максим суолунан" диэн ааттаах дьүһүйүү турда.

Максим Кирович Аммосов аатын үйэтитиигэ быйыл Өрөспүүбүлүкэҕэ араас таһымнаах тэрээһиннэр тохтообокко ыытылыннылар. Төрөөбүт 125 сылын туолар дьоро күнүгэр, "Чаҕылхай Максим суолунан" театрализованнай дьүһүйүү көһүннэ.  Дьүһүйүүгэ Максим Аммосов олоҕун уонна Киргизияҕа, Казахстаҥҥа үлэлээбит сылларын хабан көрдөрдүлэр. Маны тэҥэ, кини тутта сылдьыбыт маллара, архыып, хаартыскалара быыстапка буолан көрдөрүүгэ турдулар.

"Төрөөбүт күнүгэр бары "Триумфка" муһуннубут. Холобура, 3 тыһыынчаттан тахса көрөөччү кэллэ, театрализованнай дьүһүйүү туруоруутугар тыһыынчаттан ордук киһи кыттыыны ылла. Тэрээһин кэмитиэтин уонна Ил Дархан Айсен Николаев этиитинэн, Максим Аммосов төрөөбүт күнүнэн, Өрөспүүбүлүкэҕэ 100 сылбытын бэлиэтээһини түмүктүөххэ диэн уопсай санааҕа киирдибит. Бу барытын сүрүннүүр, түмэр тэрээһин буолар", - диэн Саха сирин култууратын миниистирэ Юрий Куприянов иһитиннэрдэ.

Максим Кирович Саха судаарыстыбаннаһын тэрийиигэ, национальнай политиканы оҥорууга уонна онно бэйэ дьонун бэлэмнээһиҥҥэ, баартыйа тутулун олохтооһуҥҥа, саха дьонун бииргэ түмүүгэ сүҥкэн кылааты киллэрбит киэн туттар киһибит буолар.

Тумус туттар киһибит аатын сүгэр Хотугулу-Илиҥҥи федеральнай университекка, күн бүгүн, 19 тыһыынчаттан тахса устудьуон үөрэнэр. Манна Саха сириттэн эрэ буолбакка, 40 тахса араас омук сириттэн оҕолор кэлэн үөрэнэллэр.

"Биһиэхэ бу улахан чиэс. Тоҕо диэтэххэ, ыйбыт этиилэригэр олоҕуран, чаҕылхай энергиялаах, инниҥ диэки тобу көрбүт суолун батыһан, биһиги  университеппыт Сахабыт сирин, Дойдубут сайдыытыгар биир эмиэ сүрүн олохтоох тэрилтэ буолуохпут диэн улахан эрэл баар", - диэн М.К. Аммосов аатынан ХИФУ ректора Анатолий Николаев этэр.

Чаҕылхай Максим аата кырдьык өрөгөйдүүрүн иһин охсуһуу, ийэ дойдуга таптал уонна бэриниилээх сыһыан бэлиэтэ буолбута. Кини чаҕылхай аата Саха сирин историятын кытта биир ситимнээх