Дьокуускайга ыт приютугар 500-тэн тахса бүрүсүлүөс ыарыылааҕы буллулар

Быстах кэмҥэ дьиэ кыылын тутар пууҥҥа уопсайа барыта 736 боруоба ылыллыбыта. ИФА ньыманан Саха сиринээҕи бэтэринээринэй чинчийэр лабораторияҕа бу анализтар оҥоһулуннулар.  Приют ыта үксэ бэрэбиэркэлэннэ. Арай 83 кырыктаах уонна 2 ыйын туола илик ыт оҕолоруттан анализ ылыллыбата. Улахан кээмэйдээх бэрэбиэркэ түмүгүнэн 500-тэн тахса пуунҥа турааччы бүрүсүлүөс курдук сыстыганнаах ыарыыга ыалдьаллара билиннэ. Бу туһунан өрөспүүбүлүкэ Ветеринарияҕа департаменын салайааччы Пётр Петров суруналыыстары кытары көрсүһүүгэ эттэ.

Петр Петров, СӨ ветеринарияҕа департаменын салайааччы: "533 ыт бүрүсүлүөстээҕэ билиннэ, онтон 126 боруоба саарбах уонна 77 ыт  сыстыганнаах ыарыыга хаптарбатахтара билиннэ".

Санатан эттэххэ, бүрүсүлүөс баара алтынньы ыйга биллибитэ. Онно биэс ыт аналиһа бигэргэммитэ. Саха сиригэр ыт бүрүсүлүөһэ бастаан туруута бэлиэтэнэр. Онон соһуччу кэлбит сыстыганнаах ыарыыны күүстээх хонтуруолга тутууга  бырабыыталыстыба хамыыһыйата  тэриллэн үлэлиир. Анализ түмүгүнэн бүрүсүлүөстээхтэр диэн быһаарыллыбыт ыттарга билигин  бэрэбиэркэ  өссө атын ньымаларынан салҕанар.

Петр Петров, СӨ ветеринарияҕа департаменын салайааччы: "биэс ыттан боруоба ылан серологическай чинчийиигэ Амур ветеринарнай лабораториятыгар уонна бактериологическай анализка Санкт-Петербург куоракка ыыттыбыт".

Үөһэ этиллэн ааспыт анализ ыллылыбатах ыттарыгар приют хаһаайына аккаас суруйбутунан, билигин тустаах миэрэҕэ тардарга дьыала барар. Исписэлиистэр этэллэринэн ыт бүрүсүлүөһэ дьиэ кыылыгар эрэ буолбакка киһиэхэ дөбөҥнүк сыстар, олус кутталлаах ыарыы. Онон ылыллар миэрэлэр, биллэн турар, эмиэ кытаанахтар. ыты тутар пуун инники дьылҕата билигин хаттаан атын ньыманан оҥоһуллар анализтартан тутулуктанар

Суруналыыстары кытары көрсүһүүгэ этиллибитэн, атын сиргэ ыытыллыбыт анализтар атын антигенынан оҥоһуллубут буоланнар араастаһаллар диэн быһаардылар. Дойду бэтэринээрийэҕэ быраабылатыгар ыйылларынан бүрүсүлүөс эмтэммэт, 15 хонук иһинэн ыалдьыбыт кыыл утутуллуохтаах. Ол эрэн хаһаайыттар аккаастанар түгэннэрэ үгүһүн бэлиэтээтилэр. Күн бүгүн 16 административнай дьыала  Россельхознадзор салалтатыгар ыытыллыбыт.

Онтон киин куоракка көрүүтэ-истиитэ суох сылдьар ыттарга  анаан эбии С блок диэн арылынна. Онон иччитэ суох түөрт атахтаахтары тутуу сөргүтүлүннэ. Манна 300 ыкка анаан 30 уйаны оҥордулар. Күн бүгүн киин куоракка, Жатайга, Ньурбага уонна Үөһээ Бүлүүгэ харантыын салҕанар. Хаттаан анализтар түмүктэриттэн көрөн туһааннаах миэрэлэр ыллыллыахтара диэн департамент салайааччыта түмүктээн эттэ.