Биэнсийэ пуондатын үлэһиттэрэ таһымнарын үрдэтэллэр

Өҥөнү ылыы нэһилиэнньэҕэ судургу, дөбөҥ буоларын инниттэн  кэлэр сылтан Пенсия пуондата уонна Социальнай страховкалааһын пуондата холбоһуохтара. Холобура, доруобуйатынан хааччахтаах киһи пенсиятын уонна инбэлиитигэр көрүллэр көмөнү икки араас сиргэ сайабылыанньалаан ылар эбит буоллаҕына, билигин биир сиргэ кииннэниэ. Оҥоһуллар өҥө хаачыстыбатыгар билигин болҕомто күүһүрэр. Ол курдук 195 пенсия пуондатын үлэһитэ "Цифровой трансформация" диэн үөрэхтээһини аастылар. 

"Биэнсийэ пуондата Саха сиригэр биир кэлим тэрилтэ буолбуппут, биир юридическэй сирэй буолан балтараа сыл үлэлээн кэллибит. Ол биллэн турар, биһиэхэ үлэбитигэр кэлэктииби салайыыга, нэһилиэнньэни кытта үлэҕэ саҥа ирдэбиллэри туоруорда. Саамай сүрүнэ диэн бу үөрэх түмүгүн бэйэбит күннээҕи үлэбитигэр-хамнаспытыгар туһаныахтаахпыт. Нэһилиэнньэҕэ оҥорор социальнай өҥөлөрбүт судургу, түргэн, үрдүк хаачыстыбалаах буолларын ситиһэрбитигэр бу үөрэх улахан төһүү буолуоҕа дии саныыбын" – диэн РФ Пенсияҕа пуондатын Саха сиринээҕи салаатын салайааччы Георгий Степанов диэн санаатын үллэһиннэ.

Үөрэх икки ый утсата салҕанан барда. Эбии үөрэхтээһиҥҥэ бары салаа, улуустар салайааччылара хабылыннылар. Аныгы кэм ирдэбилигэр сөп түбэһиннэрэн сыыппара эйгэтин баһылааһын уонна сүрүнэ, үлэһиттэр санааларын, сыһыаннарын тосту уларытыыга болҕомтону ууран куурус ыытылынна. Үөрэх түмүгүнэн курсаннар бырайыак оҥорон көмүскээтилэр.

Мотрена Анемподистова, РФ Пенсияҕа пуондатын Саха сиринээҕи салаатын нэһилинньэни кытта үлэҕэ салаа салайааччыта: "Биһиги бу үөрэххэ элбэҕи үөрэттибит. Ханан биһиги “синньигэс сирбит” баарын ырытыстыбыт уонна көннөрүүгэ үлэлэһиэхтээхпит туһунан бырайыак оҥорон таһаардыбыт"

Тэрилтэ таһымын үрдэтии  региоҥҥа кэнники кэмҥэ тэтимнээхтик сайдар. Бу маны идэҕэ урутаан бэлэмниир киин иилиир-саҕалыыр. Киин уонна Пенсия пуондата икки өттүттэн бастакы улахан бырайыактара буолар. Маны таһынан идэҕэ урутаан үөрэтэр киин национальнай бырайыактар регионнааҕы киининэн ананан үлэтэ суох аччааһыныгар үлэлэһэр. Быйыл өрөспүүбүлүкэҕэ 2220 квота көрүллэн үөрэхтээһин ыытыллынна.  

Андрей Андреев, идэҕэ урутаан үөрэтэр киин дириэктэрин солбуйааччы: "Биһиги кииммит информационнай уонна методическа көмөнү оҥорор үөрэх тэрилтэлэригэр. Биһиги сүүмэрдээһини тэрийэбит. Ол курдук быйыл үөрэх кииннэрэ өрөспүүбүлүкэҕэ элбээтилэр. Күн бүгүн 34 үөрэх тэрилтэтэ бу бырайыакка үлэлии сылдьар".

Тэҥҥэ үлэлэһии түмүгэр тэрилтэ таһымын, чуолаан нэһилиэнньэҕэ өҥөнү онорооччуларга, туһуланар үөрэхтээһиннэри инникитин сайыннарар сорук турарын ыйдылар.