Дьокуускайга "Хоро Бэргэн" төрүт ох саанан ытыы күрэҕэ ыытылынна

Күрэхтэһиигэ уопсайа 12 улуус араас нэһилиэктэрин хамаандалара кэлэн күөн көрүстүлэр, бастыыр иһин кииристилэр. Кыттааччылар бары сахалыы таҥнан, төрүт ох саанан ыттылар. Күрэхтэһиигэ идэтийбит спортсменнар буолбакка, таптаан дьарыктанааччылар кытыннылар.

Сахалыы таҥастаах, саха төрүт ох саатын илиилэригэр туппут дьон "Дохсун" спорт комплексыгар муһуннулар. Манна боростуой улэһит дьону тэҥэ,  нэһилиэктэр, улуустар баһылыктара, кинилэри солбуйааччылара кытыннылар. Күрэхтэһии сүрүн сыала-соруга, Улуу Хоро оҕонньор аатын үйэтитии диэн Уус-Алдан улууһун Хоро нэһилиэгин баһылыга  Алексей Ушницкай кэпсээтэ:

"Улуу Хоро оҕонньор былыр Уус Алдаҥҥа "Мүрү" эбэҕэ кэлэн, тула өттүн сөбүлээн, онно олохсуйан, тэнийэн олорбут. Хоро оҕонньор 9 уоллаах, ол уолаттара Өрөспүүбүлүкэбит араас муннуктарынан тиийэн олохсуйаннар, билигин үгүс улууска Хоро диэн нэһилиэк баар".

Бу күрэхтэһиигэ Дьокуускай куораттан уонна 12 улуустан, уопсайа 128 киһи кэлэн кыттыыны ылла. Хамаандалар 5 бөлөххө арахсан күрэхтэстилэр. Хас бөлөх ахсын, сүрүн бириис - саа. Ону таһынан, уопсай күрэх түмүгүнэн сыаналаах бириистэр турдулар. Сыл ахсын кыттааччылар таһымнара үрдээн, ох сааны сэҥээрээччи элбээн иһэрин тэрийээччилэр бэлиэтииллэр.

"Кэнники бириэмэҕэ сүрдээҕин сайынна диэххэ сөп. Уонна уруккутун улуус кииннэригэр эрэ сайдар эбит буоллахтарына, билигин дэриэбинэлэргэ эмиэ сайдан эрэллэр. Ити Мэҥэ Хаҥаласка, Уус Алдаҥҥа, Намҥа, Чурапчыга бэйэлэрин улуустарын иһигэр кэҥэтэннэр, бэйэлэрин улуустарын спартакиадалыргар киллэрэннэр, дэриэбинэҕэ тарҕатан иһэллэр", - диэн  күрэхтэһии сүрүн судьуйата Борис Олесов  этэр.

Бу күрэхтэһиини Саха өрөспүүбүлүкэтин ох сааҕа федерацията, хара тэриллиэҕиттэн ыла, иилээн-саҕалаан ыытар. Үлэлээбиттэрэ үһүс сыла буолбут эрээри, ситиһиилэрэ үгүс. Спорт министиэристибэтин көмөтө, өҥөтө да элбэх. СӨ Саха төрүт ох саанан ытыыга федерациятын бэрэссэдээтэлэ Пётр Бурцев иһитиннэрбитинэн:

"Федерация официальнай регистрацияламмыта 3 сыл эрэ буолла, ол бириэмэ иһигэр маастар нуормата баар буолла. СӨ спордун маастарын нуормата баар буолла, быраабыла бигэргэннэ уонна саамай сүрүн ситиһиибит, спортивнай көрүҥ быһыытынан реестрга киирдэ".

Төрүт оҕунан ытыыны, биир бастакынан Чурапчы улууһа саҕалаабыта. Бу күрэхтэһиигэ халыҥ хамаанданы аҕалан, ситиһиилээхтик кытыннылар.

"Бэйэбит хамаандабытыгар 10-тан тахса киһи баар: ветераннар, уолаттар, кыргыттар. Брыта толору састаап уонна нэһилиэктэр баһылыктарыттан бэрэстэбиитэл баар. Онон толору хамаанда  кэлэн турабыт. Сыл аайы элбэх күрэхтэһиилэргэ ыыталлар, онно сылдьабыт. Уонна оттон холобура, бэйэбитигэр азартаах баҕайы.  Киһи бу көрүҥҥэ ылыстаҕына, адьас тохтобула суох дьарыктана сылдьыан сөп курдук көрөбүн, манна саас диэн мэһэйдээбэт, барыта үчүгэй кэрэ", -  диэн Чурапчы улууһун олохтооҕо, күрэх кыттыылааҕа  Гаврил Яковлев кэпсиир.

Тэрээһин төрүт ох саа федерацията сылын ахсын ыытар биир бөдөҥ күрэҕэ буолар. Ону тэҥэ, нэһилиэк баһылыктара иһитиннэрэллэринэн,  Өрөспүүбүлүкэ Хоро нэһилиэктэрин, Улуу Хоро оҕонньор аатын үйэтитиигэ туһуланан, өссө да сайдан ыытылла  туруохтара.