"Сыл бастыҥ ыала" күрэх кыайыылаахтарын чиэстээтилэр.

Дьокуускайга үөрүүлээх быһыыга-майгыга "Ийэ сылын" түмүктүүр тэрээһин буолла. Бырабыытылыстыба бэрэссэдээтэлин солбуйааччы Сергей Местников бастыҥ ийэлэргэ судаарыстыбаннай наҕараадалары туттарда.

Маны тэҥэ, үөрүүлээх тэрээһиҥҥэ өрөспүүбүлүкэтээҕи "Сыл бастыҥ ыала" күрэх кыайыылаахтарын чиэстээтилэр. Сыл элбэх оҕолоох ыалынан Мэҥэ Хаҥалас Хаптаҕайыттан Игнатьевтар дьиэ кэргэн кыайыыны ситистэ. Улахан дьиэ кэргэн алта оҕолоох. Биэс сыллааҕыта бэйэлэрэ нэһилиэктэригэр мастарыскыай арынан миэбэл оҥоруунан ылсан дьарыктаналлар. 

"2019 сылга миэбэл оҥоруутугар түспүппүт, улахан ыскааптарга, остуолларга. Дьон бэйэтэ ыыппыт дизайнынан, үксүн оһуордаан оҥоттороллор", - диэн "Элбэх оҕолоох ыал-2022" номинация кыайыылааҕа Татьяна Игнатьева үллэһиннэ.

Барыта сэттэ номинациянан кыайыылаахтар ааттаннылар. Кинилэр ортолоругар "Тыа сирин ыала" номинацияҕа, эмиэ Мэҥэ Хаҥалас улууһуттан сыльдар, Федоровтар дьиэ кэргэн тэҥнээхтэрин булбатылар. Марина, Спиридон биэс оҕолоохтор, бэйэлэрэ бөдөҥ хаһаайыстыбалаахтар. Үлэһит тыа ыала оҕолору кыраларыттан үлэҕэ сыһыаран, төрүт саха үгэһинэн иитэр ордук диэн санаалаах.

"Бары тэҥҥэ сүбэлэһэн, кыттарга санаммыппыт. Кыайыахпыт диэн эрэммэтэхпит. Билигин кыайаммыт үөрүүбүт муҥура суох", - диэн ыал ийэтэ Марина Федорова этэр.

Быйыл дьиэ кэргэн күрэҕэр 108 ыал кыттыбыт. Бу хаһааҥҥытааҕар да элбэх ыал кыттыыта.  Онон тыҥааһыннаах күрэх буолан, бары түмүгү долгуйа күүппүттэр. Барыта онлайн нөҥүө тэриллибитэ. 

"Сыл бастыҥ көс ыалынан"  Эбээн Бытантай улууһуттан Юмшановтар-Колесовтар дьиэ кэргэн ааттаннылар.  Кинилэр удьуор табаһыт ыал, төрүт үгэстэригэр оҕолорун сыһыараллар. Оттон "Оҕо иитэр ыал" номинация кыайыылааҕынан Өлөөн улууһун Ээйик нэһилиэгиттэн Петровтар дьиэ кэргэн буолла. Кинилэр төрөппүтэ суох хаалбыт уонна тулаайах уон тоҕус оҕону  иитэллэр. Сорохторо ыал буолан туспа олороллор.  Хас биирдии ыал үс сүүс тыһыынча сууммалаах сертификатынан бэлиэтэннилэр.

"Үгэстэри илдьэ сылдьар" ыалынан Амматтан Егоровтар дьиэ кэргэн, оттон "Кыһыл көмүс дьиэ кэргэнинэн" Өлүөхүмэттэн Светлана, Петр Горбунковтар ааттаннылар. Кинилэр 52 сыл бииргэ олорон кэллилэр, аҕыс оҕону атахтарыгар туруордулар. Оттон "Сыл бастыҥ эдэр ыалынан" Дьокуускайтан Петровтар дьиэ кэргэн буоллулар. Айталина, Дмитрий көхтөөх, иллээх дьиэ кэргэн түөрт оҕолоохтор.   Күрэххэ урукку сылларга кыттан, холонон баран, кыайыылааҕынан таҕыстылар. 

"Сүрүнэ, бэйэ бэйэни өйдөһөн, ким тугу баҕарарынан сүбэлэһэн, кыыһырсыбакка куруутун маннык дьиэ кэргэни кытта тэҥҥэ сылдьан, бары сынньанаргытыгар", - диэн Айталина Петрова сүбэлиир. Маны тэҥэ, тэрээһиҥҥэ "Дьоруой ийэ", "Ийэ албан аата" уонна "Гражданскай килбиэн" судаарстыбаннай наҕараадалары  туттардылар.