Маҥнайгы бырамыысылыннас уонна сир баайын хостооһунун  форума

Саха сиригэр маҥнайгы бырамыысылыннас уонна сир баайын хостооһунун тула улахан форум ыытыллынна. Тэрээһиҥҥэ Уһук Илин уокуругуттан  бөдөҥ бырамыысылыннай тэрилтэлэр кыттыыны ыллылар. Чинчийиилэри оҥорор тэрилтэлэр итиэннэ бу хайысхаҕа үөрэтэр, каадырдары бэлэмниир үрдүк үөрэх кыһалара бииргэ түмсэн, тутаах кыһалҕалары, инники сыаллары-соруктары туруордулар. Форумҥа 20 былаһаакка хас да хайысханан үлэлээтэ, барыта 200 кэриҥэ бөдөҥ тэрилтэлэр кыттыыны ыллылар. Саха сиригэр хас да сүрүн дохуоттаах салаа баарыттан, биирдэстэрэ бырамыысылыннай уонна производственнай салаа буолар.

Хампаанньалары кытта үлэлэһэргэ табыгастаах уонна барыстаах буоларын курдук, олохтоох каадырдары бэлэмниир усулуобуйаны тэрийии буолар диэн "Навахту14.РФ" бырайыак салайааччыта Петр Чехордун кэпсиир: "Форум кэрчигинэн, биһиги туох инициатива оҥордохпутуна, бырамыысылыннай эйгэҕэ үгүс киһи, элбэх хаманаһы аахсыан сөбүн быһаарыстыбыт. Бырайыакпытын кытта үлэлэһэр 36 хампаанньа баар. Сүүстэн тахса тыһыынча киһи, биһиги баазабыт информационнай сиэтигэр олорор уонна күн аайы вакансиялары көрөр. Ол онтон сөп түбэһэр дьону, эбэтэр разрядтара тиийбэт, үөрэҕэ суох гынан баран, баҕа санаалаах дьону хомуйаммыт үөрэттэрэбит, үлэҕэ киллэрэбит. Күн ахсын биирдиилээн, эбэтэр ыйынан бырамыысылыннай хампаанньаларга  гурууппалар бараллар. Сүрүннээн, чох, алмаас, көмүс өттүгэр барар буоллахтарына, быйылгыттан саҕалаан нефть, гааз өттүгэр күүскэ кимэн киирэн эрэбит".

ХИФУ геолого-разведочнай факультета 40 сыл кэриҥэ, Саха сиригэр бырамыысылыннаска, нефть, гааз эйгэтигэр исписэлиистэри бэлэмниир соҕотох кыһа буолар. Факультет бөдөҥ бырамыысылыннай хампаанньалары кытта ыкса үлэлэһэр. Олохтоох каадырдары иитэн-үөрэтэн таһаарар биһиги бастыҥ сыалбыт-сорукпут диэн факультет кэпсиир. Олохтоох нэһилиэнньэни бырамыысылыннай салааҕа бэлэмнээһин уонна үлэҕэ киллэрии сүрүн сорук буолар. Аан бастакытын ыытыллыбыт бөдөҥ форум көтөхпүт боппуростара, баар кыһалҕалары туоратыыга, бырамыысылыннас тэтимнээхтик сайдыытыгар, саҥа саҕахтары арыйыыга улахан суолталаах буолуохтара.