"Биснез-экспо 2022" үгүс олохтоох оҥорон таһаарааччыны түмтэ

Урбаан үгүс хайысхатыгар оҥорон таһаарааччылар биир сиргэ түмүстүлэр. Тастан киирии бобуулаах кэмигэр бэйэ киэнинэн солбуйуу үтүө көрдөрүүлээҕин быыстапка дакаастыыр. Ол курдук  үүт, эт астан саҕалаан тутуу матырыйаалыгар, таҥнар таҥаска тиийэ көрдөрүүгэ турбут. Дьон ордук киин сиргэ атыыга кэлбэт, улуустар оҥорон таһаарыыларын сэҥээрэр.

Мэҥэ Хаҥалас Төҥүлүтүн «Хоту» хаһаайыстыба аһын-үөлүн хамаҕатык ылаллар. Улуус тэрилтэлэрин толору бэйэ аһынан хааччыйан олорор кэпэрэтиип халбаһы хас да көрүҥүн, тоҥ эттэн бородууксуйаны уонна үрүҥ ас эгэлгэтин аҕалбыт. 

Лия Борисова, "Хоту" кооператив маҕаһыынын сэбиэдиссэйэ: "Биһиги тэрилтэбит улууска баар үөрэх тэрилтэлэрин бэйэ этинэн, үүтүнэн хааччыйан олорор. Кэпэрэтиип сүрүн сыала-соруга – сибиэһэй бэйэбит оҥорон таһаарбыт аспытынан олохтоохтору аһатыы".

Онтон Ньурба улууһун Хаҥалас нэһилиэгиттэн Саввиновтар дьиэ кэргэн ыҥырыа мүөтүттэн, эмтээх оттортон бородууксуйалары аҕалан үгүс сэҥээриини ыллыллар. Кинилэр минньигэс мүөт эрэ буолбакка ыҥырыаттан киһи доруобуйатыгар, сүрүннээн тыынар уоргаҥҥа, сүһүөххэ туһалаах суурадаһыннары оҥорон таһаараллар. Маны сэргэ анал аппаратынан үүнээйи сүмэтин ылан, туругу тупсарар бородууксуйа үгүс көрүҥүн оҥороллор. Дьиэ кэргэн Уһук Илин гектарыгар бэйэ дьарыгын сайыннарар, маны сэргэ быйыл улуус иһинэн ыытыллыбыт Норуот көҕүлээһинин сылын чэрчитинэн өйөбүл ылан бородууксуйаларын тупсаҕай хахтыыр буоллубуттар.

Дайаана-Сайдам Саввинова, "Күөх Ньурба" эко-пасека салайааччыта: "Биһиги мүөттээх ыҥырыаны иитиинэн дьарыктаммыппыт 9 сыл буолла. Ньурба улууһун Хаҥалаһыгар эмтээх үүнээйини барытын таба тутар курдук  көһөрө сылдьан мүөтү хомуйабыт. Атырдьах ыйыгар мүөппүт ыгылыннаҕына начаас бүтэрэллэр. Ону таһынан олохтоох эмтээх оттортон араас бородууксуйалары оҥоробут. Холобура, кытыантан эфирнай арыы. Ону таһынан баттахха, сирэйгэ туттарга уонна иһэргэ анаан гидролаттары оҥоробут".

"Бизнес-Экспо" быыстапка сылын аайы ахсынньы ый бүтэһик күннэригэр ыытыллар. Бырааһынныьк иннинэ дьон-сэргэ олохтоох оҥорон таһаарыыны биир сиртэн ыларыгар табыгастаах буоллун диэн итиэннэ урбаанньыттары өйүүр сыалтан. Онон быыстапкаҕа бэлэххэ биэрэргэ сөптөөх илиинэн оҥоһук арааһа, маны сэргэ саҥа дьыллааҕы сандалыга уурар күндү ас эгэлгэтэ. "Хоту Балык" тэрилтэ эмиэ дьиэ кэргэнинэн олохтоох оҥорон таһаарыыны сайыннарыыга үлэлэһэр. Дьоҕус сыахха балыгы тууһууллар, тоҥнуу сииргэ сөптөөх гына ыраастаан суулууллар, барыта 10 тахса көрүҥү онороллор.  Булуҥ балыгынан эргинэр тэрилтэ инникитин кэҥиир былааннаах. 

Алексей Птицын, "Хоту Балык" тэрилтэ салайааччыта: "Инникитин кэҥиир былааннаахпыт. Кэпэрэтиип тэринэн тыа хаһаайыстыбатын министиэристибэтин кытары үлэлэһэр былааннаахпыт көмө ылар сыалтан. Билигин бэйэбит кыахпытынан үлэлиибит".

Тэрээһини "Мой бизнес" диэн урбаан министиэристибэтин тэрилтэтин көҕүлээһинэн ыытылынна. Быыстпканы сэргэ баҕалаах дьоҥҥо бизнеһы саҕалыыр ыпчыгар-чымпыгар сүбэлэри биэрдилэр.