Аркадий Алексеев 85 сааһыгар аналлаах быыстапка арылынна

Ахсынньы 15 күнүгэр Ярославскай аатынан "Саха түмэлигэр" Аркадий Михайлович Алексеев 85 сааһын туолбут үбүлүөйүгэр  анаан, «Саха норуотун сомоҕо талаана» диэн быыстапка арылынна. Аркадий Михайлович «Саха хомсомуолун» бириэмийэ лауреата, «СССР физическэй култууратын туйгуна», «Саха Өрөспүүбүлүкэтин култууратын үтүөлээх үлэһитэ», норуодунай артыыһа, ускуустуба үтүөлээх диэйэтэлэ, Саха Өрөспүүбүлүкэтин бочуоттаах олохтооҕо, Россия, Саха сирин суруналыыстарын сойууһун чилиэнэ.

«Биир интириэһинэйэ диэн, кинигэлэри аҕалан туттардым. Бу 1964 сылтан 2020 сылга диэри, мин туспунан суруллубут 279 ыстатыйалартан хомуллубут, спорт да туһунан, мин ол айар үлэһит быһыытынан эйгэм туһунан, бэртээхэй кинигэ таҕыста. 3 эрэ устуука, ону аҕалан туттардым. Лоомтукаҕа мин аапынан култуура дьиэтэ баар. Онно мантан ордубуттан музей арыллан турар. Филиал курдук буолар. Онон икки музейдаах курдук буолан тахсабын», - диэн Аркадий Алексеев үөрэ кэпсээтэ. Быыстапкаҕа Аркадий Михайлович музейга бэлэх ууммут сэдэх маллара, күүстээх спортсмен буоларын туоһулуур ситиһиилэрэ, бэлиэлэрэ, кубоктара, дьиэ кэргэнин архыыбыттан  бэйэтэ уруһуйдаабыт уруһуйдара, мастан кыһан оҥорбут статуэткалара, бастакы грампластинкаҕа уһуллубут ырыаларын хомуурунньуга уонна да элбэх араас интэриэһинэй экспонаттар турдулар. Аркадий Михайлович аатынан быыстапка тохсунньу 15 күнүгэр диэри туруоҕа.