Саахымат III кэнгириэһэ түмүктэннэ

Хаҥалас улууһугар саахымакка өрөспүүбүлүкэтээҕи кэнгириэс ыытылынна. Тэрээһин иитинэн оҕолорго өй-мэйии оонньуутугар олимпиада, турнир, уһуйааччылар истэригэр уопут атастаһыыта, куурустар буоллулар. Кэнгириэс түмүгүнэн өрөспүүбүлүкэ оскуолаларыгар саахымат кулууптарын арыйыы уонна "Азия оҕолоро" оонньууларга саахымат көрүҥүн киллэрии буолла.

Олоҥхо дьоруойдарынан оҕоҕо саахымат оонньуутун билиһиннэрии. Маннык ньыманы туһанан Дьокуускай куорат 18-с нүөмэрдээх оҕо уһуйаанын иитээччилэрэ кырачааннары өй-мэйии оонньуутугар үөрэтэллэр. Саахымакка оскуола иннинээҕи саастаах оҕо интириэһин тардарга диэн остуол оонньуутун араас көрүҥүн хамаҕатык туһаналлар.

Изабелла Омонова, Дьокуускайдааҕы 18-с нүөмэрдээх оҕо уһуйаанын иитээччитэ: "Саахымат курдук уустук эйгэҕэ хас биирдии оҕону сыһыарар сыаллаах үлэлиибит. Саахымат хаамыытын олоҥхо оонньуурдарынан чиҥэтэбит".

Тэрээһиҥҥэ кырачааннарга саахыматы үөрэтэр өрөспүүбүлүкэ араас оҕо уһуйааннара мустубуттар. Хас биирдии уһуйаан остуол оонньуутун үөрэтэр туспа ньымалаах. Манна даҕатан эттэххэ, саахымакка оҕону кыра сааһыттан үөрэттэххэ кини толкуйа сайдар, итиэннэ өйүгэр инники дьайыыларын ойуулаан көрөрүгэр, саас сааһынан былаанныырыгар көмөлөһөрүн иитээччилэр ыйдылар.

Өрөспүүбүлүкэтээҕи саахымат кэнгириэһин иһинэн хас да тэрээһин ыытылынна. Ордук интириэһинэйэ - эдэр саахымаччыттар норуоттар икки ардыларынааҕы гроссмейстер Антон Шомоевы кытта оонньуулара буолла. Манна биллиилээх саахымаччыт тэҥинэн 15 оҕону кытта биир партияны оонньоото. Оонньуу түмүгэр кини саха оҕолорун таһымнара үрдүгүн бэлиэтээтэ.

Манна даҕатан эттэххэ, кэнники сылларга Саха сиригэр оҕолорго саахымат көрүҥэ сайдар суолу тобулар. "Саахымат - оҕолорго, саахымат - оскуолаларга" диэн бырайыак үлэлиир. Тустаах бырайыак өрөспүүбүлүкэ сүүстэн тахса оҕо уһуйаанын уонна оскуолатын хабар.

Владимир Егоров, СӨ саахымакка федерациятын салайааччыта: "Бырайыакка барыта түөрт тыһыынчаттан тахса оҕо хабыллан утумнаахтык дьарыктанар. Инникитин саахыматы оскуола олимпиадаларыгар киллэрэри былаанныыбыт".

Уопсайынан кэнгириэс түмүгүнэн Саха сиригэр саахымат сайдыытын тосхолун торумнаатылар. Ол курдук, биир улахан ситиһии саахымат спорт көрүҥүн быһыытынан "Азия оҕолоро" оонньууларга киириэҕэ.