Бэрдьигэстээххэ "Солнышко" оҕо уһуйаана 45 сыллаах үбүлүөйүн бэлиэтиир

Бу күннэргэ Бэрдьигэстээх "Солнышко" оҕо уһуйаана 45 сыллаах үбүлүөйүн бэлиэтиир. Үйэ аҥарыттан эрэ арыый кылгас кэм иһигэр, тэрилтэ үгүс ситиһиилэрдээх ыччаты иитэн таһаарда. 1976 сыллаахха  Горнай улууһун толоруулаах кэмитиэтин быһаарыытынан, 4 кыбартыыралаах олорор дьиэни 50 миэстэлээх дьааһыла оҥорор туһунан дьаһал тахсыбыта. Онтон нөҥүө сылыгар, сэтинньи ыйтан "Солнышко" дьааһыла саад, оччотооҕу типовой бырагыраамманан, оҕолору нууччалыы тылынан иитиигэ үлэтин саҕалаабыта.

"Бастакы сэбиэдиссэйинэн Попова Людмила Прокопьевна үлэлиир. Кини педагогическай үлэ бэтэрээнэ, биһиги киэн туттар сэбиэдиссэйбит. Уопсайа 15 сыл үлэлээбитэ", - диэн уһуйаан сэбиэдиссэйэ Марианна Сидорова иһитиннэрэр.

Бииртэн сэттэтигэр диэри саастаах оҕолор 2 бөлөххө арахсан сылдьыбыттара. Манна Сэбиэскэй союз араас муннуктарыттан кэлбит исписэлиистэр, олохтоох оҕолору кытта биир дьиэ кэргэн курдук оонньоон-көрүлээн, үөрэнэн сылдьыбыттара.

"Уһуйаан саҥа арыллан , түүннэри-күнүстэри үлэлиир этэ. Оҕолор бэнидиэлниккэ кэлэн баран, субуотаҕа дьиэлэригэр төннөллөрө. Кэллэктииппитигэр Россия араас эрэгийиэннэриттэн нуучча кыргыттара кэлэн үлэлээбиттэрэ. Мин Светлана Юрьевна диэн Хабаровскай кыыһын  кытта үлэлиир этим", - диэн педагогическай үлэ бэтэрээнэ, РФ норуот үөрэхтээһинин туйгуна Екатерина Лукина иториятыттан үллэһиннэ.

Уһуйаан араас таһымнаах куонкурстарга ситиһиилээхтик кыттар. Оскуола кэнниттэн уһуйааҥҥа үлэлээн, кынат анньыммыт, оҕо иитиитигэр олохторун анаабыт иитээччи, педагог кыргыттар улууска аҕыйаҕа суохтар.

Олортон биирдэстэрэ, 1-кы категориялаах иитээччи Мария Федорова ааспыты ахтан-санаан ааста: "Мин "Солнышко" уһуйааҥҥа 1996 сылтан үлэлии киирбитим. Үлэлии сылдьан кэтэхтэн үөрэнэн, баспытаатал идэтин ылбытым. Үлэлээбит сылларбар талааннаах, бэриниилээх элбэх дьону кытта алтыспытым. Уһуйааммытыгар араас омук оҕолоро сылдьаллар".

Төһө да дьоҕус уһуйаан буоллар, спортка ситиһиилэммит иитиллээчилэр элбэхтэр. Ол курдук Аан дойду спортивнай күрэхтэһиилэригэр ситиһиилэнэн, Өрөспуубулукэ, ону ааһан, Россия аатын дуорааннаахтык ааттаппыт спортсменнар Кристина Устинова-Тимофеева, Татьяна Нахова, Родион Сидоров буолаллар. Ону тэҥэ, телевидение туйгуна Айталина Санникованы, улууска билбэт киһи диэн суох. Уонна уһуйаан тумус туттар киһитэ, улуус баһылыга Никита Андреев. Бу ааттаммыт дьон оҕо саастарын биир кэрэ кэмнэрин "Солнышко" уһуйааны кытта сибээстииллэр, сылаастык ахталлар.

"Биллэн турар, уһуйааҥҥа материальнай-техническай баазата олус эргэрдэ. Манна биһиги, уопсай сүбэнэн, саҥа таас оҕо саадын тутарга үлэни ыыта сылдьабыт", - диэн Горнай улууһун баһылыга Никита Андреев эттэ.

45 сыл устата үлэлээбит уһуйаан олоҕун, ситиһиилэрин туһунан толору кэпсиир, биллэн турар, кыаллыбат. Ол эрэн, уһуйааҥҥа үөрэ-көтө кэлэр оҕолор харахтарын көрдөххө, төрөппүттэр махтал тылларын иһиттэххэ, "Солнышко" уһуйаан кэнчээри ыччаты иитэн таһаарарга дьоһун кылаатын киллэрэр.