Нам улууһун I-Хомустааҕар "Хаарбах туруктаах дьиэттэн көһөрүү" федеральнай бырагыраама тэтимнээхтик үлэлиир

Нам улууһун I-Хомустааҕар «Хаарбах туруктаах дьиэттэн көһөрүү» федеральнай бырагыраама 2013 сыллаахтан тэтимнээхтик үлэлиир. Номнуо бэһис дьиэлэрин бу сыл бүтүөр диэри үлэҕэ киллэрэр былааннаахтар. Билиҥҥи туругунан эбийиэк ис бараанын, уотун-күөһүн оҥоруу, сантехникатын олордуу үлэлэрэ ыыталла тураллар.

"Аҕыйах хонугунан cүрүн уоппут киириэҕэ, онно бэлэмнэнии үлэтэ  ыытыллар. Билигин подъезд, кыбартыыралар счетчиктарын туруортуубут. Уота барыта тардыллан турар" - диэн үлэ хаамыытын  ООО "Прогресс" тутуу тэрилтэтин сүрүн энергетигэ Николай Корякин билиһиннэрэр.

Үс мэндиэмэннээх саҥа дьиэҕэ 20 ыал саҥа дьылы көрсө көһүөхтэрэ. Бэдэрээччит этэринэн былааннаммыт үлэлэр сөпкө, тиһигин быспакка ыытыллан иһэллэр. Бастакы этээскэ коммерческай сыаллаах-соруктаах тэрилтэлэр киириэхтэрэ. Манна маҕаһыыннар баар буолуохтара, нэһилиэнньэҕэ араас өҥөнү оҥорор усулуобуйа олохтонуоҕа. Онтон үөһэ этээстэргэ көһөрүү бырагырааматын кыттыылаахтара олохсуйуохтара.

"Былырыын дьиэ сыбаайаларын түһэртээбиппит уонна  тутуу үлэтин бу саас кулун тутартан саҕалааабыппыт. Ахсынньы 25 күнүгэр диэри олохтоохтору көһөртүөхпүт" - диэн болдьох туһунан ООО "Прогресс" тутуу тэрилтэтин дириэктэрин солбуйааччы Андрей Протодьяконов этэр.

I-Хомустаахтар улууска эрэ буолбакка, өрөспүүбүлүкэҕэ "Хаарбах туруктаах дьиэттэн көһөрүү" бырагырааматын олоххо киллэриигэ инники күөҥҥэ сылдьаллар. Нэһилиэккэ эһиил 6 кыбартыыралаах дьиэ тутуллуо.  Онтон бырагырааманы түмүктүүр 17 кыбартыыралаах дьиэ  2027 сылга тутуллуоҕа.

"2016 сыллаахха хаарбах туруктаах дьиэни көһөрүү бырагырааматынан 18 квартиралаах дьиэни туппуппут. Ону таһынан былырыын 17 уонна 12 кыбартыыралаах дьиэлэри үлэҕэ киллэрбиппит" -диэн ыытыллар үлэ хаамыытын I-Хомустаах нэһилиэгин дьаһалтатын исписэлииһэ Владислав Ушаков үллэстэр

I-Хомустаахтар хаарбах туруктаах дьиэни көһөрүү бырагыраамматын кыайа тутан, олоххо тэтимнээхтик киллэрэллэр. Күн бүгүн 22 ыал уочаракка турар.