Тыа сиригэр култуура эйгэтигэр болҕомто

81

Бүлүү улууһун Кыадаҥдатын "Күндэл" сынньалаҥ киинигэр материальнай-техническай баазаны саҥардыы үлэтэ ыытыллан, култуура киинин үлэтэ тосту уларыйда. Саха сирин култууратын туйгуна, эдэр эрчимнээх салайааччы Кристина Буслаева "Күндэл" сынньалаҥ киинигэр үлэ күргүөмнээҕин тэрийэр. Билигин манна Кыадаҥдаҕа бүтүн Бүлүү улууһугар биир соҕотох  лед-экран олохтоохтору үөрдэр, үлэ хаамыытын чэпчэтэр.

"Чочубут нэһилиэгин баһылыга Петр Догоюсов сүүрэн-көтөн, Өрөспүүбүлүкэҕэ култуура кииннэрин тупсарыы, сайыннарыы бырагыраамматыгар хапсан, материальнай-техническай баазаны хаҥатыыга, бу кулууп үлэтэ таһаарыылаах буоларыгар, бырагыраамманан лед-экран ылан, Бүлүүбут улууһугар биир бастакынан биһиэхэ баар буолбута", – диэн "Күндэл" сынньалаҥ киинин салайааччыта Кристина Буслаева сырдатта.

Материальнай-техническай бааза саҥарыдаллан, нэһилиэк олоҕо биллэ тупсбута, сэргэхсийбитэ. Кыра тэттик видеолары устан, нэһилиэнньэ олохтоохторо артыыс оруолугар бэйэлэрин холонон, кыра киинэлэри устан саҕалаабыттар. Маныаха уус-уран кэллэктииптэр улэлэрэ биллэ тупсубут.

Киин уус-уран салайааччыта Олимпиада Рыкунова үллэстэр: "Кулууппутугар любительскай формированиялар бааллар, онтон саамай киэҥник "Күндэл" түмсүү үлэлиир. Кинилэр тэриллибиттэрэ 10 сыла буолбута. Манна 13 кэрэ аҥар сылдьар. Араас буолар тэрээһиннэргэ көхтөөхтүк кытталлар. Үксэ элбэх оҕолоох ийэлэр. Салайааччы Томская Валентина Семеновна буолар. Биир эмиэ учугэй үлэлээх түмсүүнэн буолар "Эр хоһуун" вокальнай ансаамбыл. Ыал а5алара ыллыыллар. Бырааһынньыктарбытын үксэ ити бөлөхтөр киэргэтэллэр".

Култуура салаатын үлэтэ - тыа сирин-дьонун түмэр, сомоҕолуур. Төһө да Кыаданадаҕа эдэр ыччат хаалбатар, манна эриэккэс көстүү - дэриэбинэ библэтиэкэрэ  олохтоох уол. Төрөөбүт түөлбэтин сайдыытыгар сыалланан үлэлии-хамсыы сылдьар. Олохтоох нэһилиэнньэ тэрилтэлэрин  кытта ыкса үлэлэһэр.

"Фондабыт үчүгэй, хаҥыы турар. Саҥа кинигэлэри ыыталлар. Мин оскуоланы кытары ыкса үлэлэһэбин", - диэн Кыадандатааҕы модельнай библиотека салайааччыта Ньургустаан Софронов этэр.

Кэлиҥҥи кэмҥэ Өрөспүүбүлүкэ үрдүнэн култуура эйгэтигэр улахан болҕомто ууруллар. Тыа сирин кулууптарыгар өрөмүөн, материальнай- техническай баазаны саҥарыдыы үлэлэрэ тэтимнээхтик ыытыллаллар. Онно төһүү күүс буолаллар федеральнай уонна өрөспүүбүлүкэтээҕи бырагырааммалар.