Суруйааччы Василий Гольдеров – Ороһу Уола төрөөбүтэ 90 сыла

Суруйааччы айымньыта ааҕылларын, бэчээттэрин тухары кини тыыннаах. Онтон Василий Гольдеров - Ороһу Уолун хоһоонноро, кэпсээннэрэ кэм кэрдии тургутуутун ааһаннар, билигин да умсугуйан туран ааҕыллаллар. Маны сэргэ кини айымньылаах олоҕун суолун кыыһа хоһоонньут Саргы Куо салҕыыр. Аҕа ураты истин таптала кинини суруйааччы буолар умсугутуулаах эйгэҕэ кынаттаабыт. Баһылай Федотович  сэмээр киэн тутта "бастыҥ айымньым кыыһым" диирэ диэн бү күн үөлээннээхтэрэ үллэһиннилэр.  

"Удьуор утумунан аҕам нөҥөү миэхэ саха литературатыгар, саха тылыгар, саха поэзиятыгар таптал саҕыллан кини салҕааччыта буоларым эппиэтинэс уонна улахан дьол" - диэн аҕатын туһунан кыыһа Саргылаана Гольдерова – Саргы Куо ахтар.

Онон суруйааччы төрөөбүтэ 90 сылыгар "Аҕа таптала" диэн кинигэ үтүө бэлэх буолла. Манна Василий Гольдеров бастыҥ кэпсээннэрэ түмүллүбүттэр. Айымньыларын геройдарыгар, дьонугар - сэргэтигэр, норуотугар таптала  суруйааччы тылыгар - өһүгэр ситимнэнэн сылдьара кэпсээннэригэр арылхайдык көстөр. Ахтыы киэһэтигэр түмсүбүттэр  Ороһу Уолун эмиэ бу үтүө өрүтүн ахтан-санаан аастылар.

"Наһаа дуоһуйабын Василий Федотович курдук киһини кытта чугастык доҕордоспуппуттан. Кини мин олохпун киэргэппит киһи буолар. "Умнуллубат 10 кылаас" диэн ырыа эдэр оҕолор саҥа олоххо үктэнэр санааларын ким да эппэтэҕин курдук эппит поэт буолар. Дьэ бу диэн улахан ситиһии, дьол» - диэн үөлээннээҕэ саха норудунай суруйааччыта Николай Лугинов ахтар.

Кырдьык да, "Умнуллубат 10 кылаас" ырыаны билбэт саха киһитэ суоҕа буолуо, көлүөнэ настырыанньатын көрдөрөр уһулуччу айымньыны  мелодист Владимир Татаринов толорон ахтыы киэһэтин өссө истиҥ - иһирэх тыыннаата. Икки уһулуччу дьон айымньыта Таатта Харбалааҕын тутуу кэмигэр айыллан тахсыбыт. Владимир Татаринов "Василий Гольдеров мин олохпор улаханнык дьайбыт киһи буолар" диэн киэн тутта, ытыгылыы бар дьон иннигэр санаатын үллэһиннэ.  

Василий Гольдеров олоҕун чыпчаал ситиһиитэ - үс биллиилээх суруйааччыны иитэн-үөрэтэр таһаарбыта буолар. Баһылай Харысхал уонна Дмитрий Наумов норуодунай суруйааччылар - бу олус сэдэх буолар диэн мустубут дьон бэлиэтээтилэр. Үөрэнээччитэ суруйааччы Семен Капитонов махталын айымньыга тиспитин Баһылай Федотович чугас дьонугар бэлэх уунна.

Василий Гольдеров - Ороһу Уолун  хоһоонноро, кэпсээннэрэ уонна кэргэнигэр Фаина Платоновнаҕа суруктара ааҕааччы дьүүлүгэр сотору кэминэн  тахсыахтара диэн кыыһа Саргы Куо үтүө сонуну иһитиннэрдэ.