Хорсун оҕолору чиэстээтилэр

Кинилэр атын киһи иэдээҥҥэ түбэспитигэр туора турбатахтара. Быраабытылыстыба бастакы нүөмэрдээх дьиэтигэр хорсун оҕолору чиэстээтилэр. Ааспыт сыл күһүнүгэр Томпо улууһун Кириэс Халдьаайы нэһилиэгэр тохсус кылаас үөрэнээччитэ Вася Степанов, киэһэ ийэтин үлэтигэр баран иһэн, киһи хаһытыырын истэн, тута көмөҕө сүүрбүтэ.

"Тута онно сүүрбүтүм уонна массыынаҕа баттатан сытарын өйдөөбүтүм. Ол сыттаҕына домкраты ыйыппытым. Багажниктан ыламмын, массыынаны көтөхтөрөн киһибин быыһаабытым" - диэн Кириэс Халдьаайы орто оскуолатын 10 кылааһын үөрэнээччитэ Василий Степанов хорсун быһыыны оҥорбутун түгэниттэн үллэстэр.

Массыынаҕа баттаппыт биир дойдулааҕын маннык өлөр өлүүттэн быыһаан Вася Федерация Сэбиэтин "За прявленное мужество" диэн өйдөбүнньүк мэтээлинэн наҕараадаланар чиэскэ тигистэ. Мэтээли тэҥэ уолчаан ыксаллаах быһыы-майгы министиэристибэтин, өрөспүүбүлүкэ Правительствотын, "Россия ийэлэрэ" общественнай тэрилтэ ааттарыттан махтал суруктарынан наҕараадаланна. Уолун чиэстиир бэлиэ түгэҥҥэ Вася ийэтэ Изабелла Степанова кытынна.

"Биһиэхэ олус долгутуулаах. Хайа баҕар төрөппүт курдук оҕом туһугар үөрэбин эрэ. Ыксаллаах түгэҥҥэ уолуйан хаалбакка киһи олоҕун быһаабыта үчүгэй. Ол киһи икки кыра оҕолоох, бэйэтэ иитэр"-  диэн ийэтэ Изабелла Степанова киэн тутта кэпсиир.

Маннык наҕарааданы дойду Федерациятын Сэбиэтэ 2017 сыллаахтан олохтообута. Ол эрээри эдэркээн герой оҕолоргэ мэтээллэри туттарыы тохсус сылын ыытыллар. Вася Степановы тэҥэ наҕараадаҕа өссө түөрт уолчаан тигистэ. Ол курдук Кэбээйи улууһун Сэбээн Күөлүттэн  Аниврин Алексеев уонна Сергей Кузнецов бу сайын нэһилиэктэрэ ууга барбыт дьоҥҥо суһаллык көмөлөһөн бэлиэтэннилэр. Маны тэҥэ Бүлүү улууһугар бу соторутааҕыта уон эрэ саастаах Коля Максимов уонна Афоня Копырин  астмалаах доҕордоругар  суһал көмөнү оҥорон олоҕун быыһаабыттара. Кэбээйиттэн уонна Бүлүүттэн оҕолор кыайан кэлбэтэх буолан кини оннугар наҕараадаларын чугас аймахтарыгар туттардылар.

"Оҕолор дьон олоҕун быыһыыр хорсун холобурдара элбэх. Ити хайҕабыллаах суол " диэн ЫБМ СӨ Салалтатын кадрдары бэлэмнээһин уонна иитии үлэтигэр старшай инспиэктэрэ Мария Павлова этэр.

Аҕа дойду геройдарын күнүгэр хорсун герой уолаттары тэҥэ судаарстыбыннай наҕараадалары туттары үөрүүлээх тэрээһинэ буолла. Ил Дархан эр буолуу хорсун быһыыларын иһин уордьаннары туттарда. Бу наҕараадаҕа анал байыаннай эппэрээссийэ кыттыылаахтара уонна дьону өлүүттэн быыһаабыттар тигистилэр. Мэҥэ Хаҥалас Томторуттан сылдьар Софрон Пономарёв хантараагынан анал эппэрээссийэҕэ кыттыбыта. Түөрт ый этэҥҥэ сылдьан кэлэн баран билигин реабилитация барар.

Уордьаннары тэҥэ, баһылык өрөспүүбүлүкэ сүүс сыллаах үбүлүөйдээҕи бэлиэлэри туттарда. Куттал суоһаабытыгар туора турбакка дьону быыһаабыттар хорсун быһыылара бар дьоҥҥо холобур буолар.