Дьокууускайга уу эбийиэктэригэр нэһилиэнньэни сэрэтэр-өйдөтөр анал тэрээһиннэр ыытыллаллар

Таалай күөлгэ сарсыардаттан киһи үгүс. Тоҥон эрэр күөл аттыгар дьон тоҕуоруһар. Ыксаллаах быһыы-майгы министиэристибэтин үлэһиттэрэ күн-бүгүн нэһилиэнньэни кытары үлэлии таҕыстылар. Сүрүн сыал - чараас муус кутталын дьоҥҥо тириэрдии буолар.

Юрий Черноградский, Дьокуускай куорат олохтооҕо: «Мууска тахсыа суохтаххын, муус тоҥо илик. Оҕолорго этиэххэ наада, мууска кииримэн диэн, тостуон сөп».

Билигин чуолаан оҕолор ситэ тоҥо илик мууска тахсан алдьархай тахсыан сөп. Манна чопчулаатахха, киһиэхэ куттала суох тоҥмут муус дьэҥкир күөх дьүһүннээх буолар. Биир киһини уйар муус 10 см тэҥнэһэр, онтон маассабай хаҥкылааһыҥҥа 25 см.

Бу күн иниспиэктэрдэр хас да уу эбийиэктэригэр сырыттыллар. Күөллэр туруктарын көрдүлэр.

Александр Захаров, ЫБММ Саха сиринээҕи салалтатын алын суудуналарга иниспиэксийэ ууга куттал суох буолуутун хааччыйар салаа судаарыстыбаннай иниспиэктэр-эксперэ: «Муус тоҥон саҕалаабытынан сибээстээн ГИМС иниспиэктэрдэригэр профилактика үлэтэ күүһүрэр. Бу кэмҥэ чараас муус кутталы үөскэтэр, улахан болҕомто оҕолорго ууруллар. Сотору оскуола оҕолоругар каникул саҕаланыа. Сэрэтиэхпит этэ, күһүҥҥү албын муустан сэрэхтээх буолун, төрөппүттэр оҕолоргут ханна сылдьалларын хонтуруоллаан».

Күн-дьыл уларыйа турар кэмигэр саамай кутталлы үөскэтэр дьон - оҕолор. Онон билигин улахан болҕомто кинилэргэ. ГИМС иниспиэктэрдэрэ үөрэх кыһаларыгар мууска сэрэхтээх буолууга кылаас чаастарын ыыталлар. Күн бүгүн профилактическай уруок үөрэхтээһин киинигэр буолла.

Наталья Титова, Дьокуускайдааҕы үөрэхтээһин киинин үөрэх уонна иитии үлэтигэр дириэктэри солбуйааччы: «Үөрэхтээһин киинигэр 360 оҕо үөрэнэр. Биһи 9-11 кылааска дылы үөрэтэбит. Тымныйар кэмҥэ МЧС кэлэн лиэксийэ аахтылар оҕолорбутугар. Билигин өрүс-күөл тоҥор кэмигэр мууска тахсыы кутталлаах. Ол туһунан үөрэтиилэр олус туһалаах дии саныыбын».

Тустаах биэдэмистибэ үлэһиттэрэ билигин быыһык кэмҥэ өрөспүүбүлүкэ олохтоохторун мууска тахсартан туттунарга ыҥыраллар.