Саха сиригэр сүрэх-тымыр Киинэ үлэҕэ киирбитэ 4 сыла

Өлүөхүмэ улууһун Токко нэһилиэгиттэн сылдьар Юрий Яковлев балаҕан ыйын ортотугар инфарктаан направлениянан манна эмтэнэ киирбитэ.  Юрий Семенович бэйэтэ учуутал, эрдэ сүрэҕим моһуоктуу илик этэ диэн кэпсиир. Кадиохирургия салаатыгар бары эйэҕэс, сылаас сыһыаннаахтар, ыарыһахха олус кыһамньылаахтар диэн бэлиэтиир. 

Юрий Яковлев, Өлүөхүмэ улууһун олохтооҕо: «Сарсын реабилитационнай центрга таһаарабыт диэтилэр. Көнүүгэ барбыппын».

Өрөспүүбүлүкэтээҕи сүрэх, тымыр киинэ аһыллан үлэлээбитэ төрдүс сылыгар барда. Бу кылгас кэм иһигэр аныгы ирдэбилинэн тутуллубут, толору хааччыллыбыт Кииҥҥэ бүтүн уоунан тыһыынча киһи туһааннаах көмөнү ылан ааста.  Киин үлэҕэ киириэҕиттэн кардиохирурдар саҥа технологиялары, ньымалары баһылаан уһулуччу уустук эпэрээссийэлэри ситиһилээхтик ыытан тураллар. Неврология салаата 39 куойка-миэстэлээх. Манна инсуллаабыт дьон киирэн эмтэнэллэр. 

Анна Герасимова, СӨ сүрэх, тымыр киинин неврологияҕа салаатын сэбиэдиссэйэ: «Бу сылга саҥа ньымалары киллэрдибит. Тымыр эппэрээссийэлэрэ буолар».

Күннэтэ араас хабааннаах эппэрээссийэлэри тиһигин быспакка оҥороллор. Саҥа оборудование, аныгы технологиялар киирэн үлэ биллэ тэтимирэн ыарыһах көрдөрүнэригэр бары усулуобуйа баар.

Егор Мухин, Нам улууһун олохтооҕо: «Кардиостимулятордаах сылдьыбытым, онтукам батарейкатын уларытыахха наада буолбута. Уларыттылар, барыта үчүгэй».

Кардиохирургия салаатыгар төрүөҕүттэн сүрэҕэр пороктаах оҕотуттан саҕалаан, улахан киһиэхэ, кырдьаҕастарга араас сүрэх тымырын ыарыыларын, тэбэр тэтимин кэһилиитин эпэрээссийэлэрин барытын оҥороллор.

Анатолий Васильев, СӨ сүрэх, тымыр киинин кардиохирургическай салааҕа кардиохирург бырааһа: «Күҥҥэ биир улахан эппэрээссийэ уонна өссө 2-4 буолуон сөп. Ол таһынан коронарография, онно буллахтарына номнуо стентирование буолар».

Маныаха улуустары кытта үлэ телемедицинэ көмөтүнэн ыытыллар. Чинчийии эмиэ араас оборудованиенан чопчу оҥоһуллар буолар, диагноз туруоруута судургутуйан турар. Манна направлениенан биитэр суһал көмөнү  киһи бэйэтин көрдөрүүтүнэн эмиэ оҥоруохтарын сөп.