Алтынньы ыйга күн-дьыл уларыйар кэмигэр суолга-иискэ куттал тахсар

Травматолог идэлээх Виктор Слободчиков бу күннэргэ үлэтэ баһаамнаан турар. Бу бириэмэҕэ киниэхэ үксүн халтарыйан охтон эмсэҕэлээбит дьон көрдөрө сылдьаллар. Аҥардас биир нэдиэлэ иһигэр күн кубулҕатыттан сылтаан  үтүмэн киһи араас таһымнаах эчэйиилэри ылбыттар.

Виктор Слободчиков, травматолог быраас: «Уопсайа 100-кэ пациент кэлэр. Халтырыйбыт 40-50 игин буолуо. Илии-атах эчэтэллэр сүрүнүн».

Илии, атах тостооһууна, доргуйуу, төбө эчэйиитэ бу курдук балаһыанньа киин куоракка. Суһаллык үлэлиир биэдимистибэлэр үлэлэрэ икки бүк үрдээн, көмөҕө ыҥырыы үксээбит. Бу күннэргэ быыһыыр сулууспаҕа  эмиэ ити хайысханан иһитиннэриилэр киирбиттэр. Онтон быыһааччылар халтарыйан охтуу түгэнигэр тутатына көмөҕө ыҥырары уонна наһаа хамсаммат буолары сүбэлииллэр.

Валентин Ефремов, СӨ быыһыыр сулууспатын 3 кылаастаах быыһааччыта: «Охтубут буоллахытына бэйэҕитин кэтээн көрүҥ. Төбөҕүтүн, илиигитин арыый хамсатан көрүҥ. Барыта үчүгэй буоллаҕына биирдэ туруохха сөп. Мэйии доргуйуута бастаан көстүмүөн сөп. Онтон туран баран хотуо санаа, төбө ыарыыта, хараххыт иннигэр хара мушкалар көстөр буоллахтарына бырааска барыахха наада».

Тимир көлөлөөхтөр эмиэ халтарааны биллиллэр. Бу өрөбүллэргэ аҥардас икки күн иһигэр киин куоракка 15 суол саахала таҕыста, онно 1 киһи эмсэҕэлээтэ. Суолга куттал суох буолуутун хааччыйар иниспиэксийэ суоппардары сэрэхтээх буоларга ыҥырар.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбыннай иниспиэктэрэ: «Халтыраан кэмҥэ суолга массыына тохтуура хас да төгүл уһуур. Сатыы сылдьар дьон эмиэ болҕомтолоох буолун, суолу көҥүллэнэр эрэ сиринэн туораан уонна туоруоххут иннинэ хайаан даҕаны массыына тохтоото диэн көрүҥ».

Маны уҕарытар сыаллаах суол-иис, хомунаалынай сулууспалар икки болдьоҕунан солбуйса сылдьан үлэлииллэр. Бу хайысхаҕа үлэлэри дьаһалталар, уокуруктар хонтуруоллуллар.

Феликс Антонов, Дьокуускай куорат "Киин" уокуругун салайааччыта: «Сүрүнүн сатыы туоруур сирдэри, тохтобулларга тахсыы-түһүү өттүгэр. Күн аайы үлэлиибит».

Онтон күнү-дьылы кэтиир сулууспа иһитиннэрэринэн бу күннэргэ бэттэх өрөспүүбүлүкэ араас муннуктарыгар хаардыа, арҕаа, Арктика улуустарыгар тыалырыа. Салгын температурата 20-чэ кыраадыска тэҥнэһиэ.