Күн-дьыл туруга уларыйар кэмигэр суолга сэрэхтээх буолуу

Бүлүүлүүр аартыкка иниспиэктэрдэр массыыналары тохтотоллор, ол эрэн күн бүгүҥҥү тохтобул бэрэбиэркэлиир эрэ буолбакка, сэрэтэр сыаллаах. Күннэтэ таһырдьа уларыйа турар халлаан туругун көрөн айанныыры суоппардарга сэрэттилэр.

Манна саахал, онно оһол. Бу күннэргэ киин куоракка күн-дьыл туруга уларыйан үгүс суоппардар күчүмэҕэйдэри көрүстүлэр. Дьокуускай куорат сырыылаах уулуссаларыгар суол саахаллара тахсан, хас да килэмиэтир уһуннаах харыылар таҕыстылар.

Онон билигин иниспиэктэрдэр болҕомтолоругар тимир көлө кыһыҥҥы көлүөһэтигэр ууруллар. Суоппардар да ону өйдүүллэр. Үгүс тимир көлөнү ыытааччылар ааспыт ыйтан саҕалаан уларыттан барбыттар.

Манна даҕатан эттэххэ, киин куоракка сыл саҕалыныаҕыттан саахал көрдөрүүтэ үрдүү турар. Хомойуох иһин аартыктарга тахсыбыт быһылаантан  5 киһи суорума суолламмыт. Суоппардары икки бүк болҕомтолоох буоларга ыҥыраллар.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбыннай иниспиэктэрэ: «Халтараан кэмигэр суолга массыына тохтуура хас да төгүл уһуур. Сатыы сылдьар дьон эмиэ болҕомтолоох буолун, суолу көҥүллэнэр эрэ сиринэн туораан уонна туоруоххут иннинэ хайаан даҕаны массыына тохтоото диэн көрүҥ. Хараҥа кэмҥэ уоту тэйитэр элэмиэннэри кэтэргитин умнуман».

Билигин өрөспүүбүлүкэ бары суолларыгар бэдэрээлинэй таһымнаах аартыктарга иниспиэктэрдэр дьуһуурустубалары ыыталлар итиэннэ сэрэтэр үлэни.

Мая Местникова, СӨ суолга куттал суох буолуутун хааччыйар судаарыстыбыннай иниспиэксийэ аҕа иниспиэктэрэ: «Уопсайа 9 ый түмүгүнэн өрөспүүбүлүкэ үрдүнэн 592 ДТП таҕыста, 50 хомойуох иһин олохтон туораата, 746 киһи эчэйиини ылла, ол онтон 121 оҕо. Суол халтыраанынан сибээстээн айанньыттар быраабыланы кэспэккэ, болҕомтолоохтук айаннаан».

ГАИ иниспиэктэрдэрэ бу хайысхаҕа үлэлэрин күүһүрдэн күннэтэ сэрэтэр үлэни ыытыахтара.