Дьокуускайга суол өрөмүөнүн үлэлэрэ түмүктэнэн эрэр

203 түөлбэҕэ саҥа суол - Виктор Ефимов аатынан уулусса баар буолла. Бу сааскыттан муус устар ыйтан Хабароваттан саҕалаан Ларионоваҕа диэри 400-кэ кэриҥэ миэтэрэ уһуннаах учаастак бүтүннүү оҥоһуллунна. Өрөмүөн үлэтэ бүтэһик түмүктүүр уһугар кэллэ. Аспаал үлэтэ барыта кэриэтэ бүтэн, тротуар оҥоһуута сүрүннээн бара турар.

Ефимов уулуссата айанныырга табыгастаах буолла. Икки балаһалаах, сатыы уонна бэлэсипиэтинэн сылдьарга анаан-минээн суоллаах-иистээх, ууну ыытар оҥоһуулаах.

Тупсарыы үлэтин туспа тэрилтэ ылсан үлэлиир. Суолга ону тэҥэ суол бэлиэлэрин туруоруу, уот ситимин тардыы үлэлэрэ бараллар. Никита Старостин электромонтажнигынан үлэлээбитэ 3 сыла. Балаҕан ыйын ортотуттан манна уот остуолбаларын хаһан туруоран, билигин уоту тардыыга бэлэминии сылдьаллар.

Никита Старостин, электромонтажник: «Ефимов уулуссатын сырдатыытын оҥоро сылдьабыт. Бэйэбит туруорбут опораларбытын нумерациялыы сылдьабыт. Онтон салгыы Горсвет опоралара бараллар».

Ефимов, Ярославскай-Хабаров уулуссалар силбэһиилэрэ эмиэ оҥоһуллуоҕа. Манна светофорунан салаллар хамсааһын биир кэлим буолан толору оҥоһуллуохтаах. Бу эбиийэккэ суол үлэлэрин "РИК Автодор" тэрилтэ сүрүннүүр.

Вадим Кардашевский, суолу өрөмүөннүүр тэрилтэ инженерэ: «Бу эбийиэккэ 70-ча киһи баар. Аспаал уурарбыт хаалла. Бүтэрэр күммүт больдьоҕунан алтынньы 30 күнэ, ону 20 күҥҥэ бүтэрээри сылдьабыт».

Бөдөҥ эбийиэктэринэн Хабарова, Халтурина, Сэбиэскэй Армия 50 сыла, Ойуунускай,  Сэргэлээхтиир суол буолаллар. Халтурина уулуссаҕа өрөмүөн үлэтэ ааспыт сылтан ыытыллар.

Дьулустаан Тартакынов, суол учаастагын маастара: «590 миэтэрэ уһуннаах. Суолбут оҥоһуллубута былырыыҥҥаттан. Былырыын бэлэмнэнии үлэлэрэ барбыттара».

Быйыл Дьокуускай үрдүнэн "Олоххо-дьаһахха аналлаах инфраструктура" национальнай бырайыак чэрчитинэн 7 суол саҥардылла сылдьар.