Саха норуотун тапталлаах ырыаһыта Марина Попова - Эдьиий Марыына төрөөбүтэ 100 сылыгар анаммыт быыстапка арыллынна

"Ырыалары кынаттаабыт Эдьиий Марыына" диэн ааттаммыт быыстапка үөрүүлээх аһыллыытыгар кинини кытта чугас алтыспыт доҕотторо, биир дойдулааахтара, артыыстар кытыннылар. Кинилэр Эдьиий Марыына туһунан сүрдээх истиҥ тыллары этэн, ахтан-санаан аастылар. Бары билэр артыыспыт Александр Бурнашев Эдьиий Марыынаны пародиялыырынан киэҥник биллибитэ, норуокка сөбүлэппитэ.

Быыстапкаҕа 100-тэн тахса араас экспонат турда. Ол курдук манна Эдьиий Марыына сыанаҕа кэппит таҥаһын-сабын, киэргэллэрин көрүөххэ сөп. Ону тэҥэ кини тутта сылдьыбыт мала, иһитэ-хомуоһа, наҕараадалара турдулар. Эдьиий Марыына олоҕун устата элбэх баянистары кытта үлэлээн кэлбитэ. Онтон 2000 сыллартан олохтон барыар диэри киниэхэ доҕуһуоллаабыт баяниһынан Георгий Попов буолбута.

Георгий Попов, Эдьиий Марыына доҕуһуолдьут баяниһа: «Саха Раневскайатын курдук этэ. Наар дьээбэлиир, филосовскай этиилэри этэр, ону өйдүүр киһи өйдүүр. Мин саҥа билсэрбэр наһаа сөҕөр этим, өйдөөбөт этим, онтон кэнники наһаа судургу, боростуой барыларга биир тэҥ сыһыаннаах».

Марина Константиновна 500-тэн тахса кэнсиэр биэрбитэ, 100-тэн тахса айымньыны толорбута. Олоҕун ырыаҕа, сыанаҕа анаабыта, бар дьон махталын ылыан ылбыта.

Сайаана Попова, А.П.Решетникова аатынан музыка уонна фольклор түмэлин методииһа: «Эдьиий Марыынаны кытары алтыспыт, доҕордоспут, бииргэ үлэлээбит үөлээннээхтэрин барыларын муһаммыт бу ахтыылары уһулуохтаахпыт. Ол курдук, Эдьиий Марыынаны ахтан санаан ааһыан баҕалаахтары А.П.Решетникова аатынан муусука уонна фольклор түмэлигэр күүтэбит».

Эдьиий Марыына төрөөбүт Мэҥэ Хаҥалас улууһугар кини аатын үйэтитиигэ үлэ барар. Саха сиригэр кини үбүлүөйдээх сылын эһиил бэлиэтиэхтэрэ.

Александр Кулешов, Мэҥэ Хаҥалас улууһун култуураҕа салалтатын салайааччытын солбуйааччы: «Кини аатын сүгэр Майатааҕы оҕо искусствотын оскуолата баар. Ол иннитигэр кини пааматынньыга уонна искибиэрэ тутуллуоҕа. Онно анааммыт биһиги араас кэнсиэрдэри оҥороммут бу киирбит үппүтүн онно анаан сытыарабыт».

Марина Константиновна үлүһүйэр хоббитынан - подсвечниктары хомуйуу буолара. Быыстапкаҕа араас эгэлгэ ураты быһыылаах чүмэчини тутар оҥоһуктарын баай коллекцията харахха тута быраҕыллар. Эдьиий Маыынаҕа анаммыт быыстапка алтынньы 28 күнүгэр диэри үлэлиэҕэ.