Дьокуускайдааҕы 19 №-дээх орто оскуолаҕа саҥа буокса саалата арылынна

Саҥа буокса саалата 19 №-дээх оскуола уонна 10 №-дээх ДЮСШ күүстэринэн арылынна. 60 кв.м. хоско нэдиэлэҕэ үстэ дьарык ааһар. Манна кылаастан тутулуга суох оскуола уолаттара бары эрчиллиэхтэрин сөп. Тренер Артем Максимов дьарыктаныан баҕалаах оҕо элбэх, сүрүнээн алын кылаас үөрэнээччилэрэ суруналлар диир.

Артём Максимов, бокса тренерэ: «Оҕо физкультура курдук сылдьыбакка, эр киһи буоларыгар син биир буокса улахан көмөнү оҥорор».

Бу иннинэ усулуобуйата суох бэйэ баҕатынан эрчиллибит кыра спортсменнар саҥа буокса саала арыллыбытыттан үөрэллэр эрэ. 6а кылаас үөрэнээччитэ Саввинов Олимпий кыра эрдэҕиттэн тустууга сылдьар уонна эр киһи хайаан да успуордунан дьарыктаныахтаах диэн этэр.

Олимпий Саввинов, Д.И. Ягодкин аатынан 19-с нүөмэрдээх оскуола 6-с кылааһын үөрэнээччитэ: «Тустуу уонна буокса чаас аҥардыыта буолаллар. Наһаа үчүгэй, гынан баран спаринныырга кытаанах буолара буолуо».

Үөрүүлээх арыллыыга эдэр спортсменнар сүргэлэрин көтөҕө олимпийскай призер Георгий Балакшин уонна аан дойду үрдүнэн аатырбыт боксер Василий Егоров ыалдьыттаатылар. Эдэр саастарыттан спордунан дьарыктанар оҕолору көрөн олус үөрдүлэр.

Василий Егоров, СӨ боксаҕа федерациятын бэрэссэдээтэлин солбуйааччы: «Бу оҕолорум билигин үөрэнэллэр, ол кэннэ буоксаҕа сылдьаллар. Успуорга сылдьан куһаҕан дьаллыктан ыраах сылдьаллар уонна ис-истэриттэн күүһүрэн биэрэллэр».

Төрөппүттэр, үөрэнээччилэр, оскуола үлэһиттэрэ бары баҕаран туран бэйэ күүстэринэн урукку туттулубакка турбут хоһу сууйан тараан, кырааскалаан, анал малы салы тиэйэн, ыйаан бокса саалын оҥорбуттар.

Алексей Иванов, Д.И. Ягодкин аатынан 19с нүөмэрдээх оскуола дириэктэрэ: «10 №-дээх ДЮСШ кытары үлэлээммит былырыын тустуу саалатын арыйаммыт аны буокса саалатын арыйар санаа киирбитэ. Кэлэктииби, төрөппүттэри, оҕолору кытта сөбүлэһэн буокса саала наада диэммит бүгүн бу үчүгэй баҕайы кыбинеты оҥордубут».

Аныгы ирдэбилгэ эпиэттиир тэрил эмиэ төрөпүттэр уонна үлэһиттэр көмөлөрүнэн ылыллыбыта, ону таһынан буокса федерациятын аатыттан бэрчээккэ бэрилиннэ.