Анал байыаннай дьайыыга сылдьар биир дойдулаахтарбытыгар көмө тиһигин быспакка оҥоһуллар
Балаҕан ыйын ортотуттан алтынньы бүтүөр диэри анал байыаннай эппэрээссийэҕэ кытта сылдьар байыастарга ичигэс таҥаһы-сабы хомуйуу салҕанар. Саха сирэ эйиигин кытта уопсастыбыннай хамсааһын волонтердара "Согреем своих" диэн аахсыйа тэрийдэ.
Вера Моссоёнова, волонтёр: «Сылаас таҥастары тигэн ыытыахтаахпыт. Ким баҕар кэлэн көмөлөһүөн сөп».
Манна 2022 сылтан мобилизация саҕаланыаҕыттан бастаан биир кэлим суһал ыстаап быһыытынын көмөнү хомуйууга үлэлээбиттэрэ. Бүгүҥҥү күҥҥэ уопсастыбыннай хамсааһыҥҥа сүүһүнэн волонтер баҕа өттүнэн күүс-көмө буолар. Аксинья Иванова волонтерунан үлэлээбитэ 4 сыл буолла.
Аксинья Иванова, волонтёр: «Саҕалыырбытыгар үлэбит арыый атын этэ. Онтон иистэнэр сыах арыллан иистэнэ олоробут. Тымныы буолан эрэр, ол иһин сылаан таҥастары тигэ олоробут».
Бу "Саха сирэ эйиигин кытта" уопсастыбыннай хамсааһын тэриллибитэ төрдүс сылын бу күннэргэ бэлиэтээн тураллар.
Надежда Иванова, волонтёр: «Манна волонтердарбытын чиэстээтибит».
Аахсыйа чэрчитинэн байыастарга наскы, бэрчээккэ, балаклава, термобелье, онтон да атын наадалаах ичигэс таҥас-сап хомуйан ыытыахтара. Маны тэҥэ, биирдиилээн дьонтон баһыылка туталлар. Ичигэс таҥаһы тигэллэригэр матырыйаал элбэх барар буолан тэрилтэлэри көмөлөһөргө ыҥыраллар.
Наталья Бочкарёва, волонтёр: «Хас саллаат ахсын биирдии көстүүм биэрэллэр. Онно элбэх матырыйаал барар».
Марха олохтооҕо Аркадий Иванов кэргэнинээн иккиэн манна волонтердуу киирбиттэрэ иккис сыла. Аркадий Захарович сиэккэ тигиитигэр үлэлиир, кэргэнэ - иискэ.
Аркадий Иванов, волонтёр: «Биһиэхэ байыаннай чаастан сакаас киирдэ. 6х6 кээмэйдээх уон сиэккэни аҕыйах бириэмэ иһигэр өрөн биэриэхтээхпит. Күһүҥҥү көрүҥү таламмыт үлэлии-хамсыы сылдьабыт».
Хаххалыыр сиэккэ өрүүтүгэр күннэтэ 10-ча киһи түбүгүрэр. Эбии үлэһит илиигэ наадыйаллар.
Анна Третьякова, волонтёр: «Күҥҥэ биир сиэккэ баайабыт. Биһиги иллэн кэммитигэр көмөлөһөбүт».
Волентердар маннык үлэлээн-хамнаан төһө кыалларынан байыастарбытыгар күүс-көмө, өйөбүл буолаллар.