Томпо улууһун Охотскай Перевоз ытык сиригэр Аан дойду таһымнаах көтөрдөрү кэтээн көрөр станция үлэлиир

Ыраах тайаан сытар Охотскай Перевоз ытык сиригэр, "Куолума-Чаппанда" ураты харыстанар учаастагар, "Орто Алдан" диэн ааттаах көтөрдөрү биһилэхтиир сиргэ бүгүн үгүс киһи тоҕуоруста. Бырабытылыстыба бэрэссэдээтэлин солбуйааччы Ольга Балабкина кыттыылаах "научнай сыаллаах -  чыычаах атаҕар кэтээн көрөр биһилэҕи хайдах иилээһини дьон дьүүлүгэр көрдөрдүлэр. Бүгүҥҥү тэрээһиҥҥэ чаччыгыныарга көмүс биһилэҕи ииллиллэр.

Үгэс быһыытанан биһилэхтээх чыычааҕы үөрүүлээх быһыыга-майгыга үөһээ халааҥҥа көтүттүллэр. Тустаах тэрээһин "Кыталык көтүүтэ-Полет стерха" бырайыак чэрчитинэн ыытыллынна. Бу наукаҕа онтон салгыы Саха сирин көтөрдөрүгэр улахан төһүү буолар бырагыраама Дойду Президенэ көҕүлээбит "Экология" национальнай бырайыак чэрчитинэн олоххо киирэр.

Иван Попов, Биологическай ресурсалар, ураты харыстанар айылҕалаах сирдэр уонна аан айылгылар дириэксийэтин салайааччыта: «Сүрдээх үчүгэй база тутуллан, экотропа оҥоһуллан, дойду икки ардыларынааҕы таһымнаах көтөрү-сүүрэри биһилэхтиир ыстаансыйалаахпыт. Үлэлииргэ-хамсыырга усулуобуйа баар буолла».

Бу күн толору кыаҕын ылан эрэр аан дойду таһымнаах обсерваторияны  кэлбит ыалдьыттарга көрдөрдүлэр. Бырайыак салайааччыта Саргылана Михайлова саҥа тутуулары билиһиннэрдэ. Быйыл манна элбэх тутуу үлэтэ ыытыллынна.

Номнуо кэтээн көрөр сир ыраахтан-чугастан бу эйгэҕэ сыһыаннаах исписэлиистэр да, волонтердар да болҕомтолорун бэйэтигэр тарта. Бердвочер диэн саҥа сүүрээн, көтөрдөрү кэтээһиниэн дьарыктанар, Москва куораттан Светлана Попович кэлэн, кыталыктары көрөн үөрүүтэ баһаам.

Светлана Попович, бёрд-вочер (г.Москва): «Для многих слово «бердвочинг» незнакомо, но в переводе на русский это обозначает просто «наблюдатель за птицами». Я по России сняла уже 519 видов, проехала Россию от Калининграда до Чукотки и очень рада оказаться в гостеприимной Якутии. Вчера пролетали над головой стерхи, очень счастлива, что могла увидеть такую уникальную редкую птицу, не каждый бердвотчер в своей коллекции может похвастаться близкими съемками».

Бу күн Охотскай Перевоз оҕолоругар саамай кэтэһиилээх күн, бэрт соторутааҕыта арыллыбыт визит-кииҥҥэ манна кыталыкпытыгар анаммыт тэрээһин ыытыллынна.

Сахабыт сирин мааны көтөрүн уруйдуур-айхаалыр тэрээһин түмүктэнэн, салгыы исписэлиистэр уонна волонтердар кэтээн көрөр үлэлэрин ыытан салҕыахтара.