Дьокуускайга "Бастакылар хамсааһыннара" бастыҥнары түмтэ

Улахан көбүөр тустуутугар  тэҥнээх тыҥааһыннаах киирсиилэр Кыайыы 50 сыла успуорт дыбарыаһыгар. Кыра тустууктар улахан спортменнартан туох да уратыта суох, араас албастары, ньымалары туттан кыайыы иһин кытаанахтык тусталлар.

"Бастакылар хамсааһыннара" көҕүлээһиннэринэн, оҕо успуордун сайыннарыыга болҕомтону ууран туран, Өрөспүүбүлүкэтээҕи таһымнаах күрэх үгүс элбэх кырачаан тустууктары түмтэ. Дьокуускай куорат 7 оскуолатын 4 кылааһын  үөрэнээччитэ Богдан  Балаганский 43 киилэлээхтэргэ биир да хотторуута суох иһэр. Кини киин куорат хамаандатын чиэһин көмүскүүр.

Богдан Балаганский, күрэх кыттыылааҕа: «Бастаан Хаҥалас уола этэ. Син үчүгэй этэ кини. Онтон Нам уола этэ. Эмиэ үчүгэй күүстээх оҕо. Онтон Амма уолун кытта туһуннум. 15:13 кыайдым. Бүтэһик сөкүүндэлэргэ хотторо сыстым».

Былырыын Боотурдар оонньууларыгар бэйэлэрин үчүгэйдик көрдөрбүт оҕолор, 8 бастыҥ хамаанда тустаах күрэскэ эмиэ күөн көрүстэ. Кинилэри болҕомтолоохтук судьуйа хамыыһыйата көрөр.

Виктория Алексеева, күрэхтэһии судьуйата: «Хамаанданан буолан сүрдээх таһымнаах, хас биирдии улуус кыһаллан бэлэмнэнэн кэлэр. Күрэхтэһиилэр буолаллара наһаа үчүгэй тустуу сайдарын туһугар диэн. Хас биирдии улуус маны көрөн аныгыскыга бэлэмнээх кэлиэхтэрэ».

Күрэхтэһии 2009-тан саҕалаан 2018 сылга диэри оскуола оҕолорун икки ардыгар ыытыллар. Хамаанда формаата буолар.

Юрий Балаганский, күрэҕи тэрийээччи: «Хамаанданан киирсии, биир хамаандаҕа 15 оҕо киирэр. 4 сааһынан категориялаах уонна 15 ыйааһыҥҥа. 8 улуус киирсэ сылдьар».

Бастакылар хамсааһыннара Дойду Президенэ Владимир Путин өйөбүлүнэн тэриллибит бүтүн Дойду таһымнаах хамсааһын буолар. Саха сиригэр бу патриотическай хамсааһын киэҥ хабааннаахтык үлэлээн, бу курдук араас тэрээһиннэри ыытар.