Суол саахалын тахсыыта намтаабат

Бу ааспыт өрөбүллэргэ киин куоракка сатыы сылдьааччылары үнтү көтүү тубэлтэлэрэ таҕыстылар. Аҥардас аҕыйах күн иһигэр 3 киһини тимир көлөнөн таарыйдылар. Онтон биирдэстэрэ сокуоннай сааһын ситэ илик оҕо.

Владилена Охлопкова, Дьокуусукай куорат суол-иис инспиэксийэтин пропагандаҕа салаатын иниспиэктэрэ: «Дежнев аатынан уулуссаҕа “Тойота Королла” тимир көлө суоппара олбуор иһигэр сатыы киһини түннэри көтөн сатыы киһи араас эчэйии ылан балыыһаламмыт. Ол күн, Ойуунускай уулуссатыгар “Тойота Королла Филдер” тимир көлө суоппара оҕону түннэри көппүт, кыыс оҕо тостуулардаах балыыһаламмыт».

Онтон бу киһи дьулайар каадырдара Алдан улууһугар тахсыбыт. Барыллаан силиэстийэ түмүгүнэн 1999 сыллаах төрүөх суоппар, "Тойота Креста" мааркалаах тимир көлөнү ыытан иһэн, оскуораһын уонна күн-дьыл туругун учуоттаабакка кэлэн иһэр массыына иннигэр киирэн биэрбит. Ол түмүгэр тимир көлө "Тойота Марк-2" массыынаны кытары харсыһан, хомойуох иһин "Тойота Креста" суоппара суһал көмө кэлиэн иннинэ сырдык тыына быстыбыт. 4 олорсо сылдьааччылар араас таһымнаах эчэйиилэри ылбыттар.

Лидия Ефремова, СӨ суолга куттал суох буолуутун хааччыйар инспиэксийэ өйдөтөр-сырдатар салаатын судаарыстыбаннай инспиэктэрэ: «Өрөспүүбүлүкэ үрдүнэн 39 суол быһылаана таҕыста. Ол түмүгэр биир киһи суорума суолланна, 10 киһи араас эчэйиилэри ылла. Уопсайа суол быраабылатын кэһээһин 875 административнай матырыйаал толорулунна, ол иһигэр 30 итирик туруктаах суоппар, 5 суоппар хаттаан итирик туруктаах тутулунна, 26 ыытар бырааба суох суоппар, 9 суоппар оҕону таһыы быраабылатын кэстэ, 34 суоппар сатыы дьону суолу туорааһыҥҥа аһардыбата уонна 152 тонировка ирдэбилин тутуспах суоппардар тутулуннулар».

Манна даҕатан эттэххэ, сыл саҕаланыаҕыттан Саха сирин үрдүнэн 570 суол саахала тахсыбыт, онно хомойуох иһин 48 киһи суорума суолламмыт, 722 киһи араас таһымнаах эчэйиилэри ылбыттар. Оҕо кыттыылаах оһоллор син биир тахса тураллар. 26 сыл саҕаланыаҕыттан 108 саахал тахсан, 118 оҕо эчэйдэ. Чуолаан сатыы сылдьааччылар.

Владилена Охлопкова, Дьокуусукай куорат суол-иис инспиэксийэтин пропагандаҕа салаатын иниспиэктэрэ: «Сатыы дьоҥҥо даҕатан этиэ этибит, бүгүн күн-дьыл туруга, ардах да элбээн эрэр, ону кытары хаар түһэр уонна эрдэ хараҥарар буолла, хойуут сырдыыр буолла. Онон таҥаскытыгар ыраахтан бэлиэтээн көрдөрөр элэмиэннэри баар гынын диэн сүбэлиэ этибит».

Манна чопчулаатахха, ГАИ иниспиэктэрдэрэ күннэтэ оперативнай-риэйдэбэй тэрээһиннэрин ыыта тураллар.