Орто дойду зоопарка кыыллара кыстыкка киирээри бэлэмнэнэллэр

Дьыл кэмэ уларыйан тыынар тыыннаах бары тымныы кыһыҥҥа бэлэмнэнэллэр. Орто дойду зоопаркатын иитиллээччилэрэ кыһынын тоҥмотуннар диэн астарын икки бүк элбэттилэр. Онтон сыылла сылдьар харамайдарга дьыл ахсын туох да уларыйбат, кинилэр анал сылаас, сииктээх хоско олороллор. Кыстыкка киирэр кыыллартан улахан аҥаара көтөрдөр буолаллар. Дьэрэкээн чараас түүлэрэ түһэн, кыһыҥҥыга оҥостоллор. Онтон кыайан сайылаабат кынаттаахтарга, ичигэс хос бэлэмнэнэр.

Семён Санников, бэтэринээр: «Көтөрдөр сылаас сиргэ киирэллэр. Ол сирдэри сууйуу үлэтэ бара турар».

Зоопарка улахан аҥаарын олохтооҕо кыһыны тулуйаллар. Билигин куобахтар кугас түүлэрин маҕаҥҥа уларыта сылдьар кэмнэрэ, оттон туйахтаах кыыл элбэҕи аһаан сыатын хаһаанар. Арай үрүҥ эһэлэр тымныы түһэрин туохтааҕар да кэтэһэллэр. Хамсыыр харамайдар кыстыгы этэҥҥэ аһардалларыгар, ыалдьыбаттарын туһугар үлэһиттэр билиҥҥэттэн элбэх битэмииннэх, иҥэмтиэлээх, сыалаах аһынан аһаталлар.

Спиридон Протопопов, "Орто дойду" зоопарка дириэктэрин солбуйааччы: «Ас хаһааныыта бэлэм: от, күөх талахтар, лабыкта. Кыһын буолан астарын элбэттибит».

Уопсайа зоопарка үрдүнэн 100-тэн тахса кыыл арааһа баар буоллаҕына, кыһыҥҥы ууларыгар барсуктар уонна тыатааҕылар эрэ киирэллэр. Орто Дойдуга адьырҕа кыыллартан биир саамай кырдьаҕастара, эһэ Маша буолар. Кинини 2006 сыллаахха булчуттар соҕотох сылдьарын таба көрөн быыһаабыттара. Эһэ оҕото оччолорго атаҕын мас лаабатыгар эчэппитэ диэн зоопаарк үлэһиттэрэ этэллэр. Ол кэмтэн кини 20-с кыстыга буолар. 

Онон билигин Орто Дойду зоопааркатыгар үлэһиттэрдиин, кыыллыын-сүөллүүн уһун кыһыны көрсөргө бэлэмнэнии барар. Оттон кыстыкка толору алтынньы ый ортотуттан киириэхтэрэ.