Быйылгы быыбарга Судаарыстыбыннай Дума тохсус ыҥырыытын дьокутааттарын таллыбыт

Бээтинсэттэн саҕалаан 3 күн устата дойду быыбардыыр учаастактарыгар тыһыынчанан киһи тоҕуоруһар. Куорат 714 нүөмэрдээх быыбардыыр учаастага. Бастакы күн сарсыарда 8 чаастан киһи кэлиитэ көхтөөх. Огонеровтар дьиэ кэргэнинэн куоластыы кэллилэр. Кинилэргэ бу быыбар ураты буолла, кыра уоллара сокуоннай сааһын туолан аан бастакытын быыбардыыр.

Гаврил Огонёров, Дьокуускай олохтооҕо: «Кэллибит, гражданскай иэспитин төлөөрү. Сыл аайы сылдьабыт. Биһиги куоластаабатахпытына биһиги олохпутун атыттар быһаарыахтара диэн наар кэлэбит».

Национальнай таҥастарын кэтэн кэлээччи быыбардыыр учаастактарга аҕыйаҕа суох. Быйыл республикаҕа култуура, Арассыыйаҕа норуот сомоҕолоһуутун сылыгар ордук суолталанна. Саха сиригэр уопсайа 799 учаастак аанын тэлэччи аста.  Манна эбии 16 быстах кэмҥэ куоластыыр учаастактар тэрилиннилэр. Алта тыһыынчаттан тахса киһи кый ыраах, суол-ииһэ суох сирдэргэ болдьох иннинэ эрдэ куоластаан турар.

Саха сирин үрдүнэн быыбардааччы ахсаана 640-тан тахса тыһыынча киһи. Онтон 200-тэн тахсата Дьокуускайга олорор. Биир бастакынан быыбарга Ил Дархан Айсен Николаев куоластаата.

Айсен Николаев, СӨ Ил Дархана: «Биһиги дойдубут билигин бэйэтин салҕыы сайдатырн туһуга руустук кэмнэргэ олоробут. Уолаттарбыт дойдубут туһугар сэриилэһэ сылдьаллар. Онтон биһиги манна тыылга бэйэбит куоластааммыт, былааспыт тула түмсэммит инники барар уонна кыайыыга бэриниилээхпитин көрдөрүөхпут диэн эрэллээхпин».

Быыбар хаамыытын, туох да кэһии тахсыбатын, бэрээдэги анаммыт дьон кэтиир. Ону тэҥэ хас биирдии учаастакка булгуччу видеокамеранан кэтээн көрүү ыытыллар. 

Евгений Фёдоров, СӨ киин быыбардыыр хамыыһыйатын бэрэссэдээтэлэ: «Наблюдателлар күүскэ үлэлии сылдьаллар. Бу 3 күҥҥэ 4359 киһи үлэлиэхтээхтэр, биһиги үлэбитин-хамнаспытын көрүөхтээхтэр».

Ону тэҥэ хас биирдии быыбардыыр учаастакка волонтер сыһыарыллан үлэлиир. Егор Ноговицын үп-экономика коллеһын устудьуона, быыбарга аан бастакытын кыттар.

Егор Ноговицын, ХИФУ устудьуона, волонтёр: «Кырдьаҕастарга, инбэлииттэргэ кытталларыгар, ааҕан биэрэргэ көмөлөһөбүн».

Быыбарга көхтөөхтүк кыттыы - нэһилиэнньэ дойдутун инникитигэр кыһалларын көрдөрөр. Хас биирдии киһи куолаһа регион иннитин түстүүр.