Саха сирин үрдүнэн от былаана 90% кэриҥэ туолан турар

Бүгүҥҥү туругунан Саха сирин үрдүнэн 300-тэн тахса тыһыынча гектардаах сир охсуллан былаан 90-ча кэриҥэ бырыһыана туолла. Быйылгы от былаана сыллата буоларын курдук 423 тыһыынча туонна диэн бигэргэтиллибитэ, онтон бүгүҥҥүгэ 376 тыһыынчаттан тахсата оттонно. Ону кытта сиилэһи уган, сенаһы суулаан бэлэмнээтилэр. Кэккэ улуустар былааннарын ситиһэн олороллор.

Сахаяна Павлова, СӨ тыа хаһаайыстыбатын уонна ас-үөл бэлиитикэтин миниистирин солбуйааччы: «Күн-бүгүн былааны толордулар: Ньурба оройуона – 101%, Аллараа Халыма оройуона – 101%, Жатай – 229%, Мииринэй оройуона – 102%, Уус Алдан улууһа - 100%, Уус Майа оройуона - 100%. Атын оройуоннар кыратык хаалан иһэллэр, ол гынан баран оҥорон таһаарбыт объемнара Мэҥэ Хаҥалас улууһугар, Амма улууһугар уонна кэккэ улуустарга объемунан быдан элбэх».

Өрөспүүбүлүкэ уопсайа 300-тэн тахса сайылыкка тыһыынчанана хороҕор муостаах сайылаан сотору кэминэн кыстык хотоҥҥо киириэ турдаҕа. Сайын устата ынах-сүөһү кыһыҥҥы аһылыгын бэлэмнээһин көхтөөхтүк барда. Сорох улуустарга күн-дьыл туран биэрбэккэ, ардаан сүгүн оттооботулар, оттуур ходуһалара улахан аҥара ууга баран улахан күчүмэҕэйдэри көрүстүлэр. Ол курдук Өлүөхүмэ улууһугар 11 аҥар тыһыынча оттуур сирдэрэ 70-тан тахса бырыһыана уу анныгар турбута, онон улууска дьоҕус этэрээттэри тэрийиигэ сайаапка ыыппыттар, билиҥҥитэ уопсай күүһүнэн былааннарын улахан аҥарын толорон иһэллэр.

Афанасий Антонов, Өлүөхүмэ улууһун тыа хаһаайыстыбатыгар салалтатын салайааччы: «10938 туонна от кэбиһилиннэ. 76,5% таҕыстыбыт былаантан. Сенаж өттүгэр 335 туонна бэлэмнэннэ уонна сиилэс өттүгэр 1675 туонна күөх маасса угулунна. Уопсай туругунан этэҥҥэ былааммытыгар чугаһатыах курдукпут».

Балаҕан ыйа ортолосто, күн-дьыл тымныйда, хаар да түһэн саҕалаата. Маныаха өрөспүүбүлүкэ үрдүнэн хойуукка диэри оттооһун былааннанар диэн тыа хаһаайыстыбатын министиэристибэтигэр иһитиннэрэллэр. Маныаха туһааннаах үп-харчы көрүллэн турар. Бүгүҥҥү күҥҥэ улуустарга тыа хаһаайыстыбатын салалталара кормовой баланстарын  оҥороллор. Ол курдук төһө от наадатын, төһө төбө сүөһү баарын чопчулаан былаан оҥостоллор. Ол кэннэ кыстыгы этэҥҥэ туоруурга бары күүһү ууруохтара.