Хаҥалас улууһун Өктөмүгэр Михаил Николаев аатын үйэтитэр мемориальнай комплекс тутуута барар

Саха сирин бастакы Президенэ Михаил Николаев көмүс уҥуоҕа харалла сытар сиригэр өйдөбүнньүк мэҥэ тааһы туруорарга үлэ күөстүү оргуйар. 13 миэтэрэ үрдүктээх стела халлааҥҥа өрө хоройон тахсан турар. Билигин манна киэргэтии, сэбэрэтин таһаарыы үлэтэ саҕаланна. Модьу үлэни оҥорорго бары албас туһаныллар.

Николай Огонеров, скульптор, РФ худуоһунньуктарын сойууһун чилиэнэ: «Сиэккэ ууруллар уонна растворунан сыһыарыллар. Форматын барытын тута сылдьар, ону таһааран барытын сыһыарабыт».

Бырааттыы Огонеровтар идэлээх скульптордар. Кинилэр Михаил Николаев аатын үйэтитэр бырайыакка бастакы кыттыылара буолбатах. Бу иннинэ Покровскайга бастакы Президент пааматынньыгын туруорбут өҥөлөөхтөр. Билигин кинилэр Сэбиэскэй Сойуус саҕаттан умнуллубут мозаика ньыманы олоххо киллэрэллэр. Матырыйаалларын барытын Москваттан сакаастаан ыллылар. Смальта - ууллубут өстүөкүлэ бөҕө көрүҥэ буолар. Онуоха сыһыарарга халлаан туруга мэһэйдээбэт диэн Егор Огонеров этэр.

Егор Огонеров, скульптор: «Күн-дьыл туруга үчүгэй, тымныйа илик. Бу түүҥҥү тымныыга үчүгэйдик хатта».

13 миэтэрэ үрдүктээх мэҥэ тутуу мемориальнай комплекс биир көрүҥэ буолар. Манна эбии амфитеатр, улуу киһибит олоҕун кэпсиир информационнай стендэ уонна алын архитектура оҥоһуктара баар буолуохтара. Хас биир тутуу ис хоһоонноох, суолталаах.

Михаил Керемясов, Үүнэр көлүөнэ тус сыаллаах пуондатын генеральнай дириэктэрин солбуйааччыта: «Стела анныгар киһи хаамар сирэ баар буолуо, Михаил Ефимович этиилэрэ гранитка быһыллан ууруллуоҕа. Уонна ол тула амфитеатр тутуллуо».

Баараҕай, модьу тутууга мэтириэт сиртэн уонна ыраахтан чопчу көстөрүгэр скульптордар ураты көрүүлээхтэр. Манна хас биир өҥнөөх таас кыырпаҕа - сөпкө ууруллуохтаах. Оннооҕор күн сардаҥата хайдах түһэригэр тиийэ болҕомто ууруллар.

Икки өрүттээх тутуу - сайдыылаах олоххо Михаил Ефимович Николаев аартыгы тэлбитэ диэн кэрэһэлиир суолталаах. Билигин үлэлииргэ бары матырыйаал кэлэн турар, таҥыллар, ууруллар. Онуоха бастакы ыалдьыттары судаарыстыбаннас күнүгэр күүтэллэр.