Саха сиригэр социальнай бырагырааманан гаас ситимин тардыы салҕанар

Владимир Иванов күөх төлөнү киллэрии эйгэтигэр 2022 сыллаахтан үлэлиир. Бу сыллар устата үгүс Саха сирин ыалын ититэ сылдьар. Күн бүгүн кини биригээдэтин кытары куорат таһынааҕы Тулагы-Киллэм нэһилиэгэр үлэлии сылдьаллар. Саамай сүрүн үлэ - күөх төлөн барар турубатын холбооһун кини эппиэтинэһигэр.

Владимир Иванов, "Сахатранснефтегаз" тэрилтэ үлэһитэ: «Стыковочнай аппарааппыт отечественнай оҥоһуулаах. Торцовкалаан, ыраастаан баран өтүүгүнэн сиэтэбит, турба араас буолар. Ону туттаран баран сыһыаран кэбиһэбит».

Балаҕан ыйын саҕатыттан бу учаастакка үлэ ыытыллан саҕаламмыта. Матырыйаалар оннулларын булан, тиэхиньикэ кэлэн, күн бүгүн манна сарсыардаттан киэһээҥҥэ диэри былааны толорор соруктаах үлэлэр ааһаллар.

Социальнай газификация бырагыраама Саха сиригэр олоххо киирбитэ номнуо 5 сылыгар барда. Бу сыллар устата 11000 ыалга күөх төлөн киирдэ, ол эбэтэр 500 км уһуннаах үлэ ыытыллынна. Билигин тустаах Тулагы-Киллэм учаастагар бу бырагыраама чэрчитинэн саҥа дьиэ тутта сылдьар ыал гаас ситимигэр туох да эҥкилэ суох холбонуохтара.

Ньургун Оконешников, "Сахатранснефтегаз" тэрилтэ учаастак маастара: «Пластик турба тарда сылдьабыт. Икки монтажнай биригээдэ кэлэн үлэлии сылдьар. Барытын сыбааркалыыбыт, хаһабыт, түһэрэбит уонна врезкалар оҥоһуллаллар. 3 экскаватор, 2 анал тиэхиньикэ үлэлии сылдьар».

Манна даҕатан эттэххэ, быйыл Өрөспүүбүлүкэ үрдүнэн бу бырагыраама чэрчитинэн 37 км уһунаах ситиминэн 1207 дьиэҕэ гаас киирдэ. Үлэ бу хайысхаҕа бара турар.

Пётр Новгородов, "Сахатранснефтегаз" тэрилтэ хапытаалынай тутуу салаатын салайааччытын солбуйааччы: «Быйыл 45 км гаас ситимэ ууруллуохтаах. 1500 дьиэҕэ гаас тардыллыахтаах. Социальнай газификация бырагыраамаҕа Саха сирин олохтооҕо барыта хапсар. Сайаапкалары Петра Алексеева аҕалыахтарын сөп, эбэтэр сайт нөҥүө».

Ыытыллыбыт сайаапканы 30 күн устата көрөллөр, ол кэнниттэн күөх төлөнү киллэрии үлэтэ ыытыллан саҕаланар.