Быйыл Нам улууһугар Дьиэ кэргэни бөҕөргөтүү сылынан биллэриллибитэ

Нам улууһун Хатыҥ-Арыы нэһилиэгин далбар хотунун, элбэх оҕолоох ийэ Саргылана Мухина сарсыардата күннэтэ бу курдук саҕаланар. Кус-хаас саҥата аһылык кэмэ тосхойбутун туоһулуур.

Номнуо хаһыс да сылын Саргылана Николаевна түргэнник сайдар көрүҥ кыыллары иитиинэн дьарыктанар. Билигин киниэхэ  сибиинньэлэртэн ураты  көтөр араас көрүҥнэрэ иитиллэ-улаата сылдьаллар.

Номнуо минньигэс этинэн Намнары сөбүлэппит индюктар хаһаайыстабаҕа бас-көс миэстэни ылаллар. Бу көрүҥ көтөр куурусса бииһин-ууһуттан төрүттээх саамай улахан көтөр буолар. Кинилэр олус түргэнник улааталлар уонна ыйааһыннара 25 киилэҕэ диэри буолар. Көрүүтэ-истиитэ да үчүгэй диэн хаһаайка кэпсиир. Онтон маннык элбэх көтөрү иитиигэ улуустааҕы "Дьиэ кэргэн экономиката" диэн ааттаах бырагыраама төһүү буолар.

Саргылана Мухина, хаһаайыстыба салайааччыта: «Семейнай экономика диэҥҥэ улууспут дьаһалтата 40% возмещение биэрэр буолан, мин элбэх оҕолоох киһи буолан наһаа туһанабын. Хас сыл аайы ылабын. 50 кус, 50 хаас, 20 индюк ылаттаабытым. Мин наар көтөрдөрү ылабын».

Өссө 2020 сыллаахха Ковид-19 дьаҥ турар кэмигэр, Нам улууһун баһылыга дьиэ кэргэн бигэ туруктаах буоларыгар туһуланан бырагырааманы олоххо киллэрбитэ. Ол курдук, түргэнник сайдар хаһаайыстыбаҕа, ити көрүҥ кыыллары, көтөрдөрү  ылыыга 40 быраһыанын судаарыстыба уйунарын туһунан уураахтаабыта. Ол кэмтэн ыла үгүс үлэ ыытыллан, быйыл 2026 сылы манна анаатылар.

Юрий Дьяконов, "Нам улууһа" МТ баһылыгын солбуйааччы: «Оройуон, нэһилиэк бүдьүөтүттэн, уонна бырагыраамаҕа кыттар киһиттэн ирдэнэр. Манна сүөһү, сылгы-убаһа, куурусса, кус-хаас, индюк ылыахха сөп. Номнуо 6 сылын ыытылла турар».

Онтон маннык үтүө бырагыраама Нам улууһугар эрэ үлэлиир. Онон бу бырайыакка кыттар олохтоохтор үөрүүлэрэ баһаам.

Саргылана Мухина, хаһаайыстыба салайааччыта: «Атын улуустар сөҕөллөр уонна ымсыыраллар».

Онтон хаһаайыстыба далбар хотуна Саргылана Мухина бу бырагыраама баарын тухары көтөрдөрүн иитиитин ыһыктыбакка илдьэ сылдьар былааннаах.