Дьокуускайга Кыайыы пааркатыгар улааппыт мастары олортулар

Маһы олордуох иннинэ анал массыына оҥорбут дьааматыгар иҥэмтиэлээх буор кутуллар. Обургу үүнээйи олоруоҕа. Онон хаһыы кээмэйэ улахан. 1,7 м кэтиттээх итиэннэ миэтэрэ 20  дириҥнээх.

Александр Барабанский, "Якутдорстрой" тэрилтэ үлэһитэ: «Хастыбыт, буор куттубут уонна ити установкабыт манна мас туруорар. Салгыы уу кутабыт уонна сирин оҥорон киирэн барабыт: тэҥниибит, буор кутабыт».

Маннык ньыма Дьокуускайга эрдэ туттулла илигэ. Мас олордор массыынаны дойду бөдөҥ тэрилтэтэ ааспыт сылга киин куоракка бэлэх ууммута. Ол кэннэ сыл устата исписэлиистэри үөрэттэрэн билигин туһаныллан саҕалаата.

Айсен Николаев, "Якутдорстрой" тэрилтэ тупсарыы үлэтин салаатын салайааччытын солбуйааччы: «Бу анал тиэхиньикэ сиртэн мастары хостуур уонна саҥа сиргэ көһөрөр. Бу харыйалары Нам улууһуттан хостообуппут уонна манна Дьокуускайга аҕалбыппыт».

Оптимал 2000 диэн массыына саамай сүрүнэ номнуо улааппыт маһы силиһин алдьаппакка эрэ түөрэн ылар. Итиэннэ көһөр сиригэр наадалаах кээмэйи бэйэтигэр олоро сылдьар буур хаһар. Кыайыы пааркатыгар  бастакы харыйалары олордууга  куорат баһылыга Дмитрий Садовников кыттыыны ылла итиэннэ бу бырайыагы салгыы сайыннарары ыйда.

Дмитрий Садовников, Дьокуускай куорат баһылыга: «Билигин үөрэнэн бастакы мастарбытын олордон эрэбит. Салгыы өссө үөрэтэн, үчүгэй ньыманы табаммыт арыый улахан мастары олордуохпут. Бизнес структуралар социальнай эппиэтинэстэрин көрдөрөллөр».

Бу массыына 10 миэтэрэ үрдүктээх мастарга тиийэ түөрэн ылар кыахтаах. Онон Саха сирин тыйыс усуолуобуйатыгар бытааннык үүнэр олордуу мастар оннуларыгар улахаттары олордон саҕалыахтара. 

Сайын саҥатыгар сынньалаҥ пааркатыгар олорбут 30 талах үчүгэйдик үүнэ турар.