Булуҥ улууһугар сайыҥҥы балыктааһын үгэнэ

Атырдьах ыйыгар Булуҥ улууһугар сайыҥҥы балыктааһын үгэнниир кэмэ. Уомул уонна тууччах бу кэмҥэ муораттан киирэр. Балык охсор кэмэ кылгас. Ону мүччү туппат туһуттан от ыйын бүтэһигиттэн балыксыттар 1 туттун 10 туттун өрүскэ тахсаллар. Эбэ дьылыттан көрөн көмүс хатырыктааҕын араастык таһаарар.

Лев Слепцов, "Булуҥ" хаһаайыстыба балыксыта: «Уомул саҕаланна, квотабыт уон туонна, ол онтон 2 туонна курдук оҥордубут».

Күндү балыгы бултааһыҥҥа уһаарба диэн ааттанар улахан харахтаах илими түһэрэллэр. Өр гымматтар тута көрөллөр, онон сууккаҕа 8 тиийэ  быраҕаллар.

Дмитрий Протопопов, "Булуҥ" хаһаайыстыба балыксыта: «4 киһи буолан балыктыы сылдьыбыт, аҕам, мин уонна бырааттарым буолан. Икки сменаҕа арахса сылдьыбыт. Түүн 2-3 быраҕабыт уһаарбабытын».

"Булуҥ" хаһаайыстыба быйыл уомулга 230 туонна былааннаах. Соругу толорууга 32 учаастакка үлэ барар. Балыктааһын манна төрүт дьарык, онон бары кэриэтэ удьуор балыксыттар, сүрүннээн биригээдэлэр дьиэ кэргэнинэн тэриллэллэр.

Гаврил Корякин, "Булуҥ" хаһаайыстыба балыксыта: «Аҕам тэрийбит учаастага, оҕо сылдьан кинилиин балыктааччыбыт. Салҕыы бэйэбит тутан олоробут учаастагы».

Быйыл балыксыттарга саҥа сүүрээн. Кинилэри кытылга бу курдук муустаах дьааһыктар күүтэллэр. Тута балыгы бу анал иһиттэргэ уган сыахха илдьиэхтэрэ. Булуҥ хаһаайыстыба быйыл сайын муус оҥорор генератор  туруорбута, номнуо олус туһалааҕын көрдөрдө. Балык температурата 0 кыраадыска диэри түһэр, онон 10 чаас устата туох да буолбат, сүрүнэ этэ сымнаабат итиэннэ түргэнник тоҥор.

Сип-сибиэһэй тутуллубутунан балык бастаан сууйуллар. Бу түһүмэх автоматическай. "Булуҥ" хаһаайыстыба Кумах Сурт диэн учаастагар аҕыйах хонуктааҕыта саҥа сыах үлэлээн саҕалаата. Манна балыгы астааһыҥҥа аныгылыы ирдэбилгэ толору эппиэттиир оборуудабанньа турда. Ол курдук сууйуу-сотуу кэннэ, наарданар, брикеттарынан эбэтэр биирдиилээн соһутан тоҥоруу оҥоһуллар. сыах сууккаҕа 10 туоннаҕа диэри балыгы астыыр кыамталаах.

Руслан Лукин, "Булуҥ" хаһаайыстыба салайааччыта: «Балык сыаҕа бастакытын тутулунна. Бу сыах стандартарга барытыгар эппиэттиир. Бу балык тас дойдуга тахсыан сөп буолар. Маннык сыах тутуллубута инникигэ хардыы диэн этиэхпин баҕарабын. Аныгы оборудобанньаны кытта тэҥҥэ олох сайдыытын кытта хардыылаан иһэбит. Маннык сайдыы хоту Арктика сиригэр киирэн иһиэхтээх. Бу үлэни өрө тутар дьоҥҥо маннык сыах тутуллубута сүрдээх суолталаах дии саныыбын».

Саҥа сыах балык хаачыстабытаны тупсарарын таһынан инниктин балыктыыр кээмэй улаатарыгар төһүү буолуоҕа. Оттон Атырдьах ыйын устата былааны толорууга балыксыттар үлэлиэхтэрэ. Ити кэннэ хоту дойду көмүс хатырыктааҕа  сайыҥҥы уу суолунан киин куоракка сотору кэминэн кэлиэ. Онтон өрөспүүбүлүкэ иһигэр итиэннэ дойду бөдөҥ куораттарыгар атыыга тарҕаныа.